Ka Deputy Commissioner ka East Khasi Hills da lai pait ko dei khmat ya ka 58 Gorkha Training Centre wa em ha Happy Valley, Shillong deiwa emlang leh neiliang ka 58 GTC u Dy. Commandant, u Superintendent of Police East Khasi Hills u Waheh Chnong ka chnong Mawshabuit yow yaklam pynbait yeiwa thut wa mih neidaw wa em ka Gate kawa da pynthut yei lai i wan kiwa chong chnong ka thaaiñ kiwa hap wow lai lyngba kani ka luti man-ka-sngi.
Ha ka yalang, da rai wow chim ki laad pynbait da ka 58 GTC yow pynsuk yei eh wa chem ki paidbah wa lailuti heiwa da yaklam bniah hajrong ini waroh.
Hajrong i dawa wow kyrriah noh ya kani ka Gate katkam wa kwah da ki chnong wa em ha kini ki thaw, neiliang ka Deputy Commissioner daw thung ko ya ka kynhun wow pynman yaka sorjamin kamjooh wow thooh ya ki kot ki sla (Revenue Document) wei yow phah yei tyrwa wa biang cha ka sorkar yow ye ko u rah smat ya ini i kaam cha ki bor wa pait ya ki chipai.
Kamtæ yow pynbait won ya iwa katni, iwa emkaam ki paidbah kamjooh yeiwa emkaam ki chipai, daw chna da ka Coordination Committee kawa daw emlang u Magistrate wa heh kyrdan, ki sahep pulit wa 3 ngut kiwa mihkhmat ki chnong yow poi chei ya pynbait na ki por cha ki por ya ki ya kajia wa mih. Neiliang u SP Shillong won daw yarap u hei ya pynlai kari.
Da rai leh wow ya krehlang waroh ki liang yow ye u wanrah yei ya sñiawthooh yow ye u pynbait ya ini i kaam wa da sah da slem.
