U Alfonbirth Kharsyntiew, General Secretary yong ka seiñ ki warep kawa tip kam ka Hill Farmer Union (Central Body) wa kiwi ki dkhot, ha ka 3 tarik uni u bnai, da lai pait ki da idæ wei da yachem ki wa ki warep yow sñiawthooh yei eh ki warep ha chnong Sohphoh, West Jaiñtia Hills wa ka thaaiñ hi waroh kawi.
Ha ini lai pait da synran lang leh da u President ka HFU Thadlaskein Block u Mutshwa Thabah, kiwa yahkhmat chnong wa kynthup ya u Secretary chnong u Foster Kharsahnoh, u Assistant Waheh Chnong u Kishon Kharsahnoh wa ki warep yong ka thaaiñ.
U Kharsyntiew da e u yei yaroh ya kiwa yahkhmat yong ka HFU Thadlaskein Block kiwa da yarap ya ki warep ha kam kini ki por wa da chem chitom ki heiwa da ye wow pynstiñ yei kit wa khia ki warep deiwa e yarap wow pynlai yaw ya ki mar rep. Da yaroh u leh ya ka Sohphoh Integrated Village Co-operative Society kiwa da yoh ya ka Cold Storage lane ka thaw booh ya ki mar rep ya kawa da yarap lyngba ka Meghalaya Basin Development Authority.
“Ka chnong Sohphoh daw man ko kam ka nongmuna (Role Model) ya kiwi won ki chnong wa kiwi won ki warep ha ka District wa ka jylla leh kamjooh,” ong u General Secretary ka HFU Central Body. Da kyntu u leh ya ki warep wow chna ya ki Co-operative Society ha ki chong ki thaw yong ki khang wow ye ki u yoh boon ki yarap na ki chnat sorkar waphær waphær.
Ka kyrwoh na u President ka HFU Thadlaskein Block u Mutshwa Thabah.
