Jowai: Ka KSU Jaiñtia Hills Unit hapoh i yahkhmat u Education Secretary u Justice Paul Lyngdoh deilang waki dkhot ka Jowai Circle wa kynthup ya u Leningrad Tariang Organising Secretary, u Phraki Thubru General Secretary, ynne ka sngi da lai pait ki yaka Kiang Nangbah Government College, Jowai kawa man kawi naka College warim tam ha Ri-loom Jaiñtia.
Heini i lai pait lai sylli ka seiñ da chem ko boon i duna yong kani ka thaw puræ nalor wa em boon ki bynta wada hap u pynchna.
U Education Secretary ka Jaiñtia Hills Unit u Justice Paul Lyngdoh ong u wa nalor i duna haka Laboratory da chem leh wa ki kamra wa haka mala wa haneiñ dooh katæ ka Science Block da joo um ko neibhah wada pai ka tnoom wei i saad leh da sngem wei synjor. Da ong wa ini booh ko hei ma ya kiwa lai puræ kiwa chong Class næ thoh Exam lada ka sorkar wym pynsmat ko u pynchna.
Chooh chooh heiyatoh waka yung (Building), boon ki bynta wada hap wow pynchna (Repair) wa kynthup nadooh ki khangyit yow lait ka um wow psiah chapoh kamra. Heijooh i por ki soodong sookun leh toh kiwa emkaam bha u pynbha pynmiat.
Da pynkynmoo haroh u wa ha u 2015 kam ki khynroo khyllood puræ da mih madan ki wow dawa yei hok neidaw i leh khlot ka sorkar hadooh wada chah dat ki haki bor ka aiñ, kamtæ kyntu u yaka sorkar wow sñiawbha ko u chimkhia yei emkaam kani College neibynta i bha i miat ka thaaiñ neibhah kani ka thaw puræ toh i dur yong ka Ri-loom Jaiñtia.
Neiliang ka Principal yong kani ka College da khana ko wa da dep phah yei thoh chaka chnat PWD wa cha ka chnat puræ puthi yei emkaam kani ka College.
