Ka MLA ka Sutnga Saipung, ka Santa Mary Shylla ynne ka sngi da lai ko cha ki chnong wa em khappood kiwa em hajan ka chnong Huroi yow lai pait yei kreh ya ka Border Haat ha chnong Huroi wa i chna ya u sarok Sonapur-Borghat wa jrong 40 Km uwa daw pynyabi ya ki chnong Shymplong, Borsara, Lejri, Lahalein, Huroi wa Hingaria.
Kini ki ar tylli ki kreh toh kiwa da wan wai da u Symbood Montri Rangbah ka jylla, u Prestone Tynsong ynnin u snem wei ynne ka sngi da emlang waka MLA wa ki bru na ka yung krehkaam u Deputy Commissioner, East Jaiñtia Hills District, na District Commerce & Industries Centre, na PWD(R) NEC Division Khliehriat, u Contractor wa u Adviser ka JAC, u Kynjaimon Amse.
Neiliang ka MLA da pynsñiaw ko yei sñiawhun yei lai i kreh ya u sarok kamjooh ya ka Border Haat wei da yooluti ko wa daw ye u pyndep yei kreh heipor wa biang. “Mar ya dep ini i kreh daw man ko i kyrkhu ya kiwa chong chnong kani ka thaaiñ ki wym jooh em yoh sarok da uwa miat,” da ong ka Santa.
Ka MLA da ong ko wa i thmu ini i lai cha kini ki chnong ha khappood toh yow pynyoo ya kiwa chong chnong wa kini ki artylli ki kreh ymtoh i kular Election donhi kamwa da em ki bru wa pynbaad. Hawa yaklam ka MLA wa ki waheh kini ki chnong da kular wow leh katwa ye yow pynbiang bordiñ kamjooh ka Mobile Network deiwa yaklam wa ka sorkar.
Da khut ko leh ya kiwa chong chnong wow ya krehlang wei wow yaichah yow ye u pyndep smat yei kreh neibhah ym dam hi u mih iyi re iyi i thut heini heitai katwa dang lai i kreh chakhmat. Da phah ko leh ya ka chnat PWD wow yarap ya ki paidbah wow pynkhooid ya u sarok manda sahkut heipor wa joor slap.
Ka MLA da yacem ko leh wa ki chipai ka BSF kamjooh ki dkhot ka KSU Huroi Unit.
