Ka Election Commission of India ha ka 18 tarik uni u bnai da pynbna ko ya ki tarik wa emkaam heiyatoh wa ka Election MLA yong uni u snem ha ki le tylli ki jylla kiwa kynthup ya ka Tripura, Nagaland wa ka Meghalaya.
Heiyatoh wa kani ka Election ynne ka sngi hapoh i yahkhmat u Deputy Commissioner ka West Jaiñtia Hills, u BS Sohliya chirup wa u Superintendent of Police, u Bikram D Marak kamjooh u S. Chauhan uwa man u Adhoc Commandant ka SSB Camp, West Jaiñtia Hills da hiar ki cha ki chnong khappood ka District wow sylli yei pynkhreh neibynta ka Election ha uni u snem.
Kini ki chnong kynthup ki ya ka Saba, Mukroh wa Barato heiwa da yachem ki leh wa ki BLO kamjooh kiwa kitkaam chnong yong kini ki le chnong.
Ha ini i sylli neiliang u DC da kylli takit u ya ki BLO heiyatoh wa i pynkhreh wow thap Vote neibynta ki bru kiwa kyrpang (kiwa em i duna hei doh i pran) kamjooh leh kiwa da em palat 80 snem i rta heiwa kammon u ye ki wow wan thap Vote wei kammon u pynkhreh neibynta yong ki.
Heijooh i por u Sohliya da phah u ya u BDO ka Laskeiñ Block, u Barister Niang wow pyntikna wa waroh kiwa chong chnong u yoh ki wow thap Vote khlem ñiaw chiliang yeiyi yeiyi katkam i thmu ka Election Commission of India.
Heijooh i por da phah leh ya u Niang wow pynbiang ya kiwa emkaam wa iwa duna wa em ha ki Polling Station.
