U Montri ka sorkar pyrdi wa pait ya ka chnat Chemicals and Fertilizers wa New & Renewable Energy, u Bhagwanth Khuba ha ka 18 tarik uni u bnai da lai u cha Nongstoin, West Khasi Hills District yow pait yei pynkrehkaam ya ki Scheme ka sorkar pyrdi hapoh ka jylla Meghalaya.
Da ong u wa kmen u yei pynkrehkaam ya ki Scheme ka sorkar pyrdi deiwa pynrap wa em hi i khuslai wa i thut wei da yaklam kammon wow pynbait yeini.
Heiyatoh wa ka PM KUSUM, Rooftop Solar Schemes, da ong u wa dang em boon ki Subsidy neibynta ki jylla ka North East, kamtæ da kyntu u ya ki bor District wow chim kabu ya ki myntoi wa em hapoh ka MNRE Scheme.
U Montri da yachem u leh wa ki waheh chnong yow ap yei chem chitom ki wei da kular u wow e yarap katwa ye yow pyndooh yei eh yong ki.
Hawa yaklam wa kiwa thoh khubor da ong u wa ka sorkar booh ko hakhmat yow pynku pynroi ya ka thaaiñ North East nadooh i pynchna ya ki sarokbah, ki sarok chnong, u pynbiang umdih wa chiboon kiwi de wei du ha kini ki 9 snem ka thaaiñ North East da ya ryngkat ko wa kiwi ki jylla hapoh ka ri.
Da pynkynmoo u wa kani ka sorkar pyrdi wa katni pyntikna ko wa man ka ar tayaaw wan ki sorkar pyrdi cha ki jylla ka North East yow pyntikna wa pynkrehkaam smat ya ki Scheme ka sorkar pyrdi kiwa yarap wow pynku ya ka imlang sahlang kamjooh ka khayi pateiñ.
U Montri da lai pait u leh ya ka Mawkawah Anganwadi Centre, ka Sibsingh Memorial Govt School Nongpyndeng waka Mawlieh Sub-Centre (Health & Wellness Centre).
Da yoh u leh wow yachem wa kiwa yoh myntoi na ki Scheme ka sorkar pyrdi wa kyntup ya ka PM AWAS Yojana wei da chem u wa biang hi i rukom pynkrehkaam ya kini ki Scheme wa e yarap cha kiwa chong chnong wei da yaroh u leh ya ki heh District kiwa da pyntikna wa waroh kiwa toh hok u yoh da yoh myntoi ki.
