Ka Khasi Students’ Union War Jaintia Circle, ka Hynniewtrep National Youth Front Southern Ri-War Circle, ka FKJGP War Jaiñtia deiwa ya emlang ka Khasi Students’ Union South Central East Circle, u Waheh Chnong Dawki, Waheh Chnong Lamin wa u Secretary yong ka Sohkha Chnong, ynne ka sngi da lai yaklam biang ki ya ki bor District wow pynsangeh chwa ya i kaam khayi pateiñ lyngba ka Tamabil LCS.
Neiliang yong ki seiñbhalang wa ki bor chnong da pyrchah joor ki ya ini khreh wai yabor ka sorkar khlem da pynbiang chwa thij pa thij ya kiwa emkaam kam ki laad yada neibhah da booh hei maa wa khroo yaka thaaiñ khlem da pynbiang næ pynkhreh chwa ya ki thaw lane ki laad sumaar lada poi u khñiang COVID-19 cha ka thaaiñ War Jaiñtia, wei lada ym ye wow kdoh u khoom ha kam ini i por ya uni u khñiang kjut wot ha ki thaaiñ wa cha kdong cha chmiang yong ka jylla leh daw sihlet hadien habood.
Hawa yaklam kiwa pyrchah yeini waka ADC ka J.U. Kharpuri, neiliang u President ka KSU War Jaiñtia Circle, President ka HNYF Southern Riwar Cicle da ong ki wa yieñ skem pyrchah joor ki neibhah katkam i yoo yei long i man dei khmat, ym pu biang i rukom pynbiang yaki laad yada ha ki liang waroh.
U Secretary Chnong yong ka Sohkha da ong u wa hadooh ynne, neiliang yong ki ym pu chah khut ki wow yaklam hajrong ini wa u Deputy Commissioner wow yatai næ wow bichaar neibynta i bha i miat ya waroh, ym toh wow pyrchah wow khayi tangwa wow em ka yaklam khnang wow tip u phah khubor cha kiwa chong chnong khnang wow tip u husiar yow lait na u COVID-19.
U Waheh Chnong yong ka Lamin da ong u wa ya kattæ hi toh wow khang chwa chipor neibhah ym pu em iwon iwon i pynbait wa ki bor District wei ym kwah wow mih paidbah katni ki sngi wei ynne da wan du kiwa kitkaam chnong wei ka sorkar toh u pyndam ko ya ini i thmu wei wow khut yaklam chwa hapyrdi ki seiñbhalang, ki bor chnong khamtam kiwa em cha kani ka thaaiñ Tamabil waka District Administration.
Ha i jooh i por, neiliang waroh kiwa yahkhmat chnong kiwa emlang ha kani ka sngi da i jooh i yumut da yaklam ki waka ADC wa toh u khut chwa wow yaklam pynbait chwa khnang yow lait u mih kiwon kiwon ki kynrum kynram hadien habood.
Neiliang ka ADC da kular ko wow khut yaklam biang deiwa emlang u Deputy Commissioner wow ya pynbait ya kani ka kaam khayi pateiñ lyngba ka Tamabil LCS.
Ini toh katkam ka kyrwoh na u General Secretary ka KSUWJC u Lurman B. Talang.
