Lai pynche ka JNV Mukhla cha ki skur ka West Jaiñtia Hills chaphang ka NEP 2020

Ka skur JNV Mukhla kam ka skur wa da chah jied wow yahkhmat yei pynkrehkaam ya ka NEP 2020 hapoh ka West Jaiñtia Hills District wei kam chibynta leh wow lehkmen yei dap le snem nadooh wa da wanrah ya kani ka New Education Policy, da lai ko cha ki skur wa em hapoh ki Block ka District yow pynsñiawthooh chaphang kani ka NEP.

Kiwa yahkhmat ka JNV da lai hiar ki cha kiwa boon ki skur yow yaklam wa kiwa sikai kamjooh ki khynnah skur yow sñiawthooh yeiwa emkaam ki wei kamjooh iwa chem chitom wow pynkrehkaam ya kani ka NEP.

Kani ka NEP u pynkylla noh ko ya iwa bood katni da ka 10+2 wei u man noh ko 5+3+3+4 iwa mut 15 snem i lai skur.

Ha ki 5 snem wa nyngkong u kynthup lang ko ya 3 snem ki Pre-School wa 2 snem ki Primary School kawa tip leh kam ka Foundation Stage. Ki Pre-School toh nadooh 3 snem hadooh 6 snem i rta dep neitæ ki 2 snem toh yow chong Class 1 wa Class 2 ya kiwa 6 snem hadooh 8 snem i rta wei i rukom yoh ki khynnah yei stat i tip toh deiwa yoh ki u yalehke kam chibynta i chah sikai.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ki 3 snem wa bood won kawa tip leh kam ka Preparatory Stage toh kawa kynthup ya ka Class 3 hadooh Class 5 neibynta kiwa 8 hadooh 11 snem i rta wei heini toh deiwa chem yeiwa ka-it ki khynnah u puræ puthi.

Ha sa ki 3 snem wa bood won kawa tip kam ka Middle Stage kawa nadooh Class 6 hadooh Class 8 u man ko wow pyntip ya ki Subject Science, Maths, Social Science, Arts wa ki Humanities wei ini toh neibynta kiwa em 11 hadooh 14 snem i rta.

Ha ki 4 snem wa khaddooh won wa tip kam ka Secondary Stage iwa mut nadooh Class 9 hadooh Class 12 toh neibynta kiwa 14 hadooh 18 snem i rta wei heini ye wow jied jar jiar ki Subject wow puræ deiwa pynchlur leh ya ki khynnah wow pyrkhat ki dei yong ki ha ki Subject wa yatoh wa da jied da ki hi.

Najrong wow pynkylla dur yei rukom e sikai wa i puræ puthi, i thong toh yow pynchlur ya ki khynnah wow sai ki dei yong ki hi i stat heithaw wa da pynmyllien katni wow thap hapoh jabien deiwa kynmoo thij dep te sai heipor wa thoh Exam.

I rukom pynman Exam leh u pynkylla deiwa bichaar ya ki khynnah waroh chi snem ha ki kaam wa ye ki u leh u pyndep wei ym chong ware iyi wa ye ki u thoh du kat ha ka Exam.