Ka seiñ All Jaiñtia Muster Roll Workers & Labour Union (AJMWLU) seiñbei, chirup wa ka Self Help Group wa man dkhot du ki wakreh Muster Roll wa ki Mid Day Meal Cooks naka chnong Mihmyntdu, da pynman yalang ki ha ka 3 tarik ha dong Lumpyrtuh heiyatoh wa ka phang i yoh myntoi ki wakreh mylla sngi waki wakreh chna yung khyndaw bilat næ ki wakreh misteri na ka Meghalaya Building and Other Construction Workers Welfare Board (MBOCWB) ka chnat ka sorkar Meghalaya kamjooh ya ka Prime Minister-SYM næ ka Pension Scheme ya kitu ki wakreh mylla sngi kiwa em 18-40 snem donhi.
Ha kani ka yalang da wan ya chimbynta da ki wakreh mylla sngi wa ki wakreh mylla sngi chna yung khyndaw bilat chirup wa ki wakreh Muster Roll wa ki MDM Cooks kiwa man kiwa chong chnong ka Dorbar Chnong Mihmyntdu. Ya ka yalang da pynlai da ka Susan Dkhar kawa man ka Chairperson ka SHG wa u K.L. Pariat President wa ka D. Ïakai ka VP ka AJMWLU seiñbei kiwa da batai pynsñiawthooh da iwa rap bniah bha heiyatoh wa i yoh myntoi ki wakreh Muster Roll ha ka chnat PWD/PHE na ka MBOCWB wa ka PM-SYM cha waroh ki wakreh mylla sngi wa ki wakreh mistri hadooh kiwa choh mooria wa kiwa tih moo ye ki u yoh yarap.
Ha kani ka yalang da em ki wakreh mylla sngi wa da im-ja dei wakreh mylla la ar snem hadooh arphaw snem tam ha i chna yung khyndaw bilat cha Jowai wa cha kiwi tawan ki chnong ha Ri-loom Jaiñtia wa cha Shillong tangwa ym jooh tip ki wa em kam ini i kyrchaan poisa ya ki, ya ki khon wa dang puræ, i yarap poisa lada mynsoo heipor wa dang kreh næ lada khlaad, kamjooh wa u yoh poisa manda toh u snem u dam noh u kreh mistri namo u kreh mylla sngi. Kamtæ, na kani ka yalang hanla man ko kawa duna ki paidbah deiwa bood ya ki kyndon yada na u COVID-19, tangwa da man won ko kawa pynkmen ya ki waroh ki wakreh mylla kamwa ya ong ki “Paya kattu ka mynried ka yong i samen, wa u stat ki khon i lyngba i puræ i yong ki da man ko kawa chngaaiñ lang ya ki waroh neidaw wa em kam kani ka yarap poisa lada man dkhot ha kani ka MBOCWB wa u pynpsiah pyrtuid ha ka PM-SYM”.
Ha kani donhi ka sngi hadooh kamwa 22 ngut ki wakreh mistri na chnong Mihmyntdu u psiah dkhot ki ha ka MBOCWB lyngba u Waheh Chnong uwa daw pynsakhiat ya i man ki kam ki wakreh mistri. Ha ki sngi kiwa daw wan dang boon chooh chooh ki mistri wa ki wakreh mylla na chnong Mihmyntdu kiwa daw psiah dkhot ha katai kawa daw e yarap ka sorkar.
Neiliang yong ka seiñ AJMWLU kyntu ko ya waroh ki wakreh mylla kiwa da im-ja dei wakreh mistri chna yung khyndaw bilat, kiwa mylla sngi dei tyndang mooria wa ya kiwa tih moo, kamjooh ki wakreh mylla sngi yow pynpsiah pyrtuid ha ka PM-SYM neibynta u yoh kyrchaan poisa man-u-bnai manda poi u snem wa da toh u dam noh ki u kreh, wa u sñiawbha phi waroh u chim ya katai ka yarap na ka MBOCWB kawa da e lyngba ka chnat Labour ka sorkar Meghalaya, deiwa lai kylli na katai ka Office kawa em ha Ladthadlaboh namo deiwa yachem wa ki wakrehkaam ka seiñ AJMWLU yow yarap ki ya phi kiwa em ha ki C&RD Block wa ha ka East Jaiñtia Hills District, Khliehriat.
Ha kani ka yalang da emlang ka M. Bareh General Secretary ka seiñ AJMWLU seiñbei wei da yoh i klam kyntu na u D. Bthuh Vice President wa u D. Suchiang ka Jowai Polytechnic Muster Roll Workers Union wa na ka K. Ryngkhlem Treasurer ka SHG Mihmyntdu.
