Ka seiñ kiwa chi lok kiwa em i jooh i sñiaw wow sumaar ya ka bei rymaw kawa da e pyrtuid kam ka Myntdu Cleaning Drive, da pyntip ki wa da dep ki wow pynkhooid hadooh kamwa 44 sien nadooh ki bynta yong ka Syntu Ksiar, ki thaw wa em u mot Kiang Nangbah, ya ka Wah Myntdu Wei kamtæ ter ter.
Neidaw wa em ka khlam COVID-19 kamjooh i khang chnong, da booh ko ya kani ka seiñ hei eh. Kamtæ ha kani ka sien wa 45 kawa da leh ynne ka 13 tarik, ki 6 ngut da mih ki hei wow lai pynkhooid wei wow sumaar ya ki symbe dieñ hadien wa da paan bor kamjooh i bood ya ki kyndon sorkar næ ki SOP.
Ha kani ka kynti, da em ya ka thong wow yaleh katwa ye yow pynneh, u pynim wei wow sumaar ya ki dieñ khian kiwa em ha tymbud u sarok Syntu Ksiar.
Ki dkhot ka seiñ da ong ki leh wa kam kiwa chong chnong toh u em i ya i kitkhlieh ha i samen hei wow yada næ sumaar ya kam kini ki dieñ kiwa emkaam yei sumaar. Da kyrpaad leh kamjooh ya ki lok ki jor wa lai uiñke, lai sñiawbha wow yaleh ki u sumaar ya kini ki dieñ khnang yow ye ki u heh u jrong.
Hadien wa da paan bor na ka chnong Panaliar kawa mantre ya kini ki dieñ kiwa em ha tymbud u sarok Syntu Ksiar kiwa ka chnong da dep thung ko nadooh ki snem wa da dep. Kamtæ dei mynsien ya krehlang da mih ki ynne i step hei wow sumaar yada deiwa e khyndaw wei thwat yaki phlang, ki ranem kiwa kah wa tymmoh ya kini ki dieñ khian.
Ka wyrta chula wa da phah cha phi waroh toh hanlada wym toh mantre ya ki dieñ, toh u em yei mynsien krehlang khnang yow ye u yada ya ka bei rymaw. Da kyntu ki leh ya ki paidbah wow em ki yei tæ i mynsien maya rymaw kamjooh u em ya i kitkhlieh ha i samen samen yow yoh yaka rymaw wa khooid wa yirngam.
