Ki bru ka State Disaster Response Force (SDRF) ynne ka sngi da lai yarap ki ha kiwa boon ki thaw kiwa chah ktah nei oor khyndaw kam ha Shillong wa i chlai um ha Kynshi Bangla neidaw wa joor u slap ha kini ki sngi.
Ha Lumparing-Parmaw ki SDRF deilang waki bru ka Fire & Emergency Services da ye ki wow chem yei metyap ki arngut ki bru na thaaiñ Lumparing-Parmaw kiwa da chah baan hei oor khyndaw iwa da tymmoh yei yung wa sah ki. Ki metyap wa da ye u sai toh yong ki arngut kiwa sah ha iwi naki 3 tylli ki yung wa chah ktah na i oor khyndaw. Ya i metyap wa nyngkong da sai heipor 10:30 i step katwa ya iwa ar da sai heipor 12 waje pyrdi sngi.
Dang thooh leh ya kiwi neidaw wa da tip wa dang em sa 3 ngut kiwa dang em hapoh ki yung wa chah ktah. Katkam wa pyntip kiwa sah cha jan, ini da jia i heipor 6 waje i step hadien wa joor u slap nadooh ynnin i miet.
Ha Kynshi-Bangla, West Khasi Hills da em i chlai um syndet heiwa ka SDRF deilang waka F&ES da pynlait ki ya 37 ngut ki bru wa sahkut ha ki thaw wa man madan kiwa da chlai um harood u sarok National Highway 44(E).
Ha Laitumkhrah Nongrimmaw ynne biang ka sngi, ka SDRF da lai yarap ki hei oor khyndaw wa khian wa jia ha Nongrimmaw, Laitumkhrah heiwa da em iwi i chram (Retaining Wall) da oor i.
