Ki Commandos ka Indian Navy kiwa tip kam ki MARCOS da ye ki wow lai pynlait ya ki bru wa em ha kawi ka jhaad heh wa kit mar pohkhyndaw (Iron Ore) kawa da chah rahbor ha ki bru wa kieñ suloi heipor wa em ko ha ka duriaw Arabian Sea ha i bynta wa jngai kamwa 460 Nautical Miles na ka ri Somalia.
Ini toh iwa da jia ynnin ka sngi wei ha kani ka jhaad da em 21 ngut ki bru heiwa 15 ngut toh ki nong India.
Kani ka jhaad toh kawa da e pyrtuid MV Lila Norfolk kawa em yaka lama ka ri Liberia kawa lai luti yow sangeh ha Bahrain tangwa hei janmiet ka 4 tarik da wan kamwa 5-6 ngut ki bru wa kieñ suloi kiwa da ku ha kani ka jhaad.
Kamtæ da phah ya ka jhaad yaleh thma ka Indian Navy kawa tip kam ka INS Chennai yow lai yarap ya kani ka jhaad hadien wa nyngkong da pyntip da kiwa em ha kani ka jhaad cha ka United Kingdon Maritime Trade Operations yeiwa jia.
Chwa wow poi kani ka jhaad yaleh thma, da phah hær da ki lieñsuiñ wow maham ya kini kiwa thmu wow rahbor ya kani ka jhaad wei kat u poi ki Commando kini ki bru ym em de ki ha kani ka jhaad wei da thooh leh ya ki na khlieh ha tre wei hadien ini da e yarap yeiwa emkaam kini bru wa pynlai ya kani ka jhaad chwa wow chah biang u pteiñ ko yei luti.
Neiliang kiwa em ha kani ka jhaad da e yaroh wei da pynsñiaw ki yei sñiaw sarong ya ki chipai ka Indian Navy yei smat ki wow wan pynlait ki du hapoh chi sngi donhi.
Discussion about this post