Ka KSU ynne ka sngi lyngba ka Mawkhar wa Jaiaw Circle da lai pynsangeh ki yei krehkaam ha Ramakrishna Mission ha Jail Road, Shillong neidaw wa katai ka thaw esiaki ym em e chuti ko hawa ka sorkar da pynbna sngi chuti ko ya ynne ka sngi wa lehkmen ya ka Seng Kut Snem.
Man-u-snem ka KSU da jooh hap lait khang khyrdep ko ya ki yung krehkaam, ki thaw e hikai, ki Bank wa kiwi kiwi ki Company ki wym kheiñ ya ki sngi kyrpang ka jaitbru Khasi kam ki sngi lyngkhooh sngi yap u Tirot Sing, Kiang Nangbah wa u Soso Tham, ki sngi leh niam ki niam tynre kam ka Shad Weiking, Pomblang Nongkrem, Behdieñkhlam, ka Seng Kut Snem wa kiwi kiwi.
Ynnin u snem ka KSU da hap khang ko leh ya kawi ka Bank neidaw wa pynman kreh ko haka Good Friday. Ka seiñ da ong ko wa rap boon kiwa pynlai ya kini ki yung krehkaam toh da ki bru kiwa na baar wei ini da pynyoo ko wa kini ki bru ym kheiñkor wei kheiñ poh ki yei man kyrpang u Khasi. Kamtæ ini i leh da pynchrai ko ya ka ki paaid Khasi khamtam ya ki khon khynroo kiwa chim ya ki luti kiwa eh neidaw wa chah yoobeiñ, chah kheiñ poh ha kiwi.
Ka KSU lyngba kani ka khubor da maham eh ko ya waroh ki yung krehkaam, ki thaw puræ, ki Bank, ki Company wa toh u burom ki ya ki sngi kyrpang ka jaitbru kamwa burom ya ki sngi kyrpang yong kiwi won ki jaitbru heh paaid, lym kamtæ ka KSU daw hap ko wow pynyoo da ki kaam hadooh wa pai ki.
