Ka Khasi Students’ Union War Jaiñtia Circle, ka Khasi Students’ Union West Jaiñtia Hills District ryngkat ka HNYF Southern Ri-War Circle ha ka 3 tarik uni u bnai da lai hiar ki cha ka chnong Rongkum Amlympiang yow phah pynsangeh syndon yei pynkreh kær pood namo ka Border Fencing ha kitai ki thaw.
Kini ki ar seiñ da ong ki wa kat wym pu pyntikna ya u pood u ang wei wow kær nadooh Zero Point, ym pdiang ki ya ini i leh yong ka sorkar ha tymbud u pood ka India wa Bangladesh hapoh War Jaiñtia. Neibhah lada kær ki kattæ deiwa jngai 150 Yard na u Zero Point daw ktah ko ya ki thaw ki bhaw yong ki paradoh parasnaam kiwa im ha katai ka thaaiñ, khamtam kiwa im ha ka rep ka riang wei ki chnong ha khappood daw dooh ki ya pood chnong pood thaw.
Kini ki seiñ da beiñ joor ki yaka sorkar khamtam ya u MLA ka thaaiñ kiwa nood wow lai chakhmat wow lilam yei thaw cha ka ri Bangladesh, wei kam uwa mihkhmat wa sakhiat toh u man u kam uwa yada yei hok manru ki paradoh parasnaam wei wow yieñ waheh neibynta i myntoi yong ka thaaiñ War Jaiñtia kamwa da kular ha u snem 2018 wa chi inchi i thaw leh ym lai cha ka Bangladesh.
Tangwa katni won mar dei khangtleiñ ki kular wa da pynchong sier ya ki paidbah ka thaaiñ kiwa em cha khappood lyngba i thmu e laad yong ka sorkar wow lai chakhmat wow kær sainar.
Kamtæ ki ar seiñ da dawa ki na ka sorkar wa na u MLA wow pyndam chwa chisyndon ya kani ka hukum wei wow chim ka luti wa kammon wow yada ya ki paradoh parasnaam wa ki thaw ha ki thaaiñ khappood.
