Ynnin ka sngi ka NSS Unit yong ka Kiang Nangbah Government College, Jowai da lai ko cha ka Ummulong Presbyterian Higher Secondary School wow klam wow pynsñiawthooh chaphang ka Rashtriya Poshan Maah namo ka National Nutrition Week.
Da yoh i batai na ki arngut ki NSS Volunteers kawi hajrong ka Women and Health namo hajrong ki kynthai wa i chait i khiah. Da batai leh wa boonsien ha ha ri yong i ki kynthai ym rap yoh ki yei sumaar wa pura kamwa yoh ki chynrang, lada ki khynthai man ki kiwa tlot hei chait i khiah ka pateiñ leh daw man ko kamjooh hi.
Da kyntu leh wa ymhoi u ñiaw chiliang ya ki khynthai toh u e salonsar ya ki hei yatoh i sumaar ya ki.
Da yoh leh yei klam ha ka phang Children and Education namo ki khynnah wa i puræ puthi. Da pynchlur ya ki khynnah skur wow man ki kiwa minot, kiwa tip bru tip Blai, wei wa ymhoi u pynsepai yei por yong ki ha ki kaamke.
Chooh chooh da ong leh wa ki khynnah kiwa em hei tip hei stat boonsien ym jooh leh kaam bakla ki. Da batai toh u chim kabu ki yei stat yong ki deiwa em i mynsein wow man ki khloor ka ri.
