Kiwa chi lok kiwa em yei jooh i sñiaw neibynta wow yada wei wow pynneh pynsah yaka Bei Rymaw kiwa da chna daka Myntu Cleaning Drive (MCD) nadooh ka 31-05-20, da ye ki wow pynkhooid ya chiboon ki thaw wa ki bynta ka wah Myntdu kam ha i madan Madiah Kmai Blai, ha thwai Syntu Ksiar, ha Thwai Lynter wa kamtæ ter-ter.
Ynnin ka 26 tarik won, kini ki chi lok da pynman ki yaka lai pynsñiawthooh paidbah hajrong ka phang, “To u man i ki nongmuna, hei wow sumaar yei jæd i pra ka Bei Rymaw” heiwa ki dkhot ka MCD da iwi i yumut da chim ki yaka rai wa haka ka sngi wa khroo ka ri ka ‘Republic Day’ toh u sdang noh da i lai pynche lai pynsñiawthooh paidbah cha waroh kiwa wan uiñke, kiwa lai baamdoh wot ya kiwa chong dukan.
Hadien wa da dep pynkhooid chwa ya ki kattu katni ki thaw wa em naam, chibet chipor da yoo yeiwa khooid, tangwa du katwon sngi donhi da mih biang ki jhep wa thymme, wei ini da pyndiaw ko ya kini ki chi lok kiwa da kreh sñiawbhah neibynta i khooid i jngiar yong waroh lang.
Kamtæ hajrong kani ka yurim da lai pynman yei pynsñiawthooh paidbah yow chon hei pyrkhat pyrdaiñ ki paidbah yow man ki kiwa lehkhooid wei kiwa em yei kitkhlieh, i sñiaw wow pynkhooid yaki thaw wa da pynemkaam ki, ym toh wow ieh roi.
Neiliang ka MCD da booh ko yei kyrpaad wa khian yow man kam ki nongmuna nadooh katni wei wow em i jooh i chimkhia kamwa leh ya i yung sem manda em leh cha lait leh kamjooh.
Da kyrmen wa lyngba i ya krehlang kiwa chong chnong ka Jowai kamjooh kiwi leh, daw yoo daw sakhi biang ya ka Bei Rymaw kawa khooid wa jngiar.
