Ynne ka sngi ki Dolloi ka Ri-loom Jaiñtia hapoh ka satri yong ka ‘Dolloi ka Ri Jaiñtia’ da hiar ki cha chnong Mukroh kawa em hapoh ka Elaka Shiliang Myntang, West Jaiñtia Hills.
Ini i hiar ki Dolloi toh wow pyntngen wow e mynsien ya ka chnong Mukroh wei khamtam ya ki manyung kiwa da dooh ya kiwa ha-yung hadien wa chah siat ki ha ki pulit ka Assam ha i step ka 22 tarik u Khonchonglad.
Ya ki Dolloi da yahkhmat da u President yong ki, u Dolloi ka Elaka Raliang, u Chawas Lyngdoh wa u Secretary, u Dolloi ka Satpator, u Daman Lakashiang.
Ha kani ka sngi da pynman yaka yalang ha Madan Mucher ha chnong Mukroh hei emlang u Secretary ka chnong, u Hamar Maskut uwa da pynlai leh ya kani ka yalang.
Neiliang ki Dolloi da pynsñiaw ki yei mynsien wa khia wa da jia ini i kaam ha ka chnong wei pynsñiaw ki yei sñiawlem cha ki manyung yong ka chnong.
Ha kani ka sngi uwi na ki waheh ka chnong, u K. Lamin da khana u ha ki Dolloi yeiwa da jia ha i step ka 22 tarik heiwa da khana che u wa ini i jia ymtoh neidaw ki dieñ tangwa hadien wa chah rah ki le ngut kiwa kit kba ha ki pulit ka Assam wei ki paidbah da lai dawa ki wow pynlait noh ya kini ki le ngut tangwa ki pulit wa ki Forest Guard da thombor wei da siat bait ki ya ki paidbah naphang.
Hadien yong ka yalang da e ya i ngooh Blai na u Dolloi ka Elaka Jowai, u Puramon Kynjing.
Ha kani ka sngi ki Dolloi da lai pyntngen wei e mynsien ki ya ki manyung yong kiwa da khlaad wei da e yarap ki leh cha kini ki manyung.
Neiliang kini ki manyung wa ka chnong Mukroh leh da kitbok ki ya ki Dolloi khnang wow ye ki u synchaar hok ya ki Elaka ka ri wa ka jait ka pateiñ mynried mankawi.
