Ka Union of Cook cum Helpers PM POSHAN Meghalaya kawa man ka seiñ kiwa chet ja sngi ha ki skur da pyntip ko wa hei sien nyngkong dooh ha i parom ka PM POSHAN (Mid-Day Meal) Scheme itæ nadooh u snem 2002 wa sdang pynkrehkaam ya ka da ka sorkar jylla Meghalaya, katni hei chemphang i krehkaam yong u Swapnil Tambe, Director Education & School Literacy wa ha i kreh chitom ka PM POSHAN (Mid-Day Meal Scheme) Cell ka sorkar jylla da su lut kattæ hadooh u bnai Khonchonglad (Nov) yong uni u snem da ka nong (Honorarium) kawa Rs. 2000 chi bnai neibynta chiphaw bnai ha ka chi snem iwa Rs. 1100 na ka bhah ka sorkar jylla wa Rs. 900 ka bhah sorkar pyrdi.
Kamtæ ka seiñ da dap ko dei kmen wei sñiawngooh hajrong ini i ye u Director wa kiwa kreh ka PM POSHAN wow pynbait ya ini i rukom su poisa. Wei ka seiñ da khut pynman ko da ka yalang ha ka 22 tarik uni u bnai ha kamra pyrkhat kaam ka chnat puræ puthi ka jylla yow pynsñiaw yei sñiawngooh wei burom ya ini i ye wow pynbait yei rukom su poisa sha ki Cook cum Helpers PM POSHAN ka jylla heiwa da ah leh ya u Cake wa e khublei Christmas wa New Year.
Kamtæ da kyrmen wa ini i su tikna ya ka poisa daw ye noh u leh nadooh u Thohlakhmi (Feb) u snem thymme deiwa su man-u-bnai khnang wow chngaaiñ i im kiwa chet ja skur kiwa em da ki hajar ngut ha ka jylla kiwa boon toh ki manbei, ki kynthai kiwa man du kiwa yarap yaka sorkar jylla wow pynkrehkaam ya kani ka PM POSHAN.
Da ong leh wa deiwa su tikna, ki khynnah skur nadooh kiwa dang khian hadooh Secondary daw yoh ki man-ka-sngi yei baam wa tei yei doh i pran yow yoh leh yei pyrkhat pyrdaiñ iwa chait neibhah ki khynnah skur man ki kam ki khon tre kiwa chet ja yow ye ki u puræ bha wei wow man ki kiwa chong chnong kiwa sñiaw tre wei kiwa em i kitkhlieh waka kaamram ya idæ samen waka ri waroh kawi.
Ka seiñ da kyrmen ko wa ka sorkar jylla daw e noh ko da ki tadong LPG cha waroh ki kamra chet ja ha skur yow yoh ki da ka la-ær wa khooid hawa kreh ki.
Discussion about this post