Jowai: U Deputy Commissioner ka West Garo Hills u Ram Singh ha kini ki kajiak sngi wa da lai sylli u ya kiwa boon ki skur hapoh ka district nadooh kiwa em ha sor kamjooh ki wa em cha nongkyndong.
Kani toh kam chibynta ka Project STAR (School Transformation through Augmentation of Resources) wa sdang u ka wow chem yei duna wa em ha ki skur nadooh iwa chem chitom kiwa sikai kamjooh ki khynnah.
Hawa lai u cha Government Girls Higher Secondary School wa em ha Ringrey da chem u wa kiwa sikai da pynemkaam ki ya kiwa boon ki rukom sikai yow suk ki khynnah u sñiawthooh tangwa kiwa sikai Science ha ki Class XI wa Class XII khlan ki u pep skur wei ini da ktah ki ya ki khynnah wei da phah u leh ya waroh ki Principal wow booddien ki ya ini i kaam.
Hei yaklam u wa kiwa sikai da chem u wa man ki kiwa em ka mynsien wow e ya ka sikai kamjooh wow pynbha ya puræ puthi hapoh ki skur sorkar.
Kiwa sikai da e daw ki wa ki bei ki pa ki khynnah boon toh kiwa ym em i stat i tip kamtæ ym em chimkhia ki ya ka puræ puthi ki khon yong ki iwa da chynnna heipor wa mih Result.
Ha Government Boys Higher Secondary School, Chandmari kawa da pynmih ko chiboon ki bru wa pawnaam kamtæ da phah ya ki wow pynkhreh ki ya ka Hall of Honour Board heiwa u booh ya ki dur kini ki khloor ka skur pyn ha i thaw psiah kani ka skur wei kiwi ki skur ki College toh u leh ki kamjooh.
U DC da phah u leh wa ki khynnah skur kamjooh kiwa sikai wow krehlang ki yow pynkhreh ya ki Charts ki Formula yow pynsuk ya ki khynnah u kynmoo ki kamjooh wow sñiawthooh ya iwa puræ ki kamjooh leh yow man ka puræ puthi kawa sñiawsuk ki.
Da pynchlur u leh wow yarap para khynnah skur kamjooh wow sñiawthooh yei wym sñiawthooh ki kamjooh leh wow pynkhrehkot ya ki jar jiar ki diah yong ki.
Ya kiwa puræ Science daw em ki Career Guidance, Counseling wow pynkhreh ya ki wow yaleh ki ya ki Entrance Test wei u pynman da ki Extra Class ya kiwa rap tlot.
Ha Hawakhana Deficit School da wai u ya ka yung skur wa dang chna thymme yong ka.
Ha Damalasim wa Dadenggre da pynchlur u ya ki khynnah wow klam ki hajrong ki phang wa boon jait wei ya kiwa stat u klam da e ya ki da ki kot.
Ha Montfort School kawa em cha nongkyndong ka District da yaroh u ya u Father George kamjooh leh ya kiwa krehlang wa oo kiwa yow wanrah ya ka puræ puthi wa pura tangwa ka sarok wow poi cha kani ka skur man ko kawa sih hadooh kattæ kattæ.
Ha Aminda Rangsa LP School hadien wa yoo waka skur toh da ka yung tin kawa da jæd da pra da phah u wow kyrriah noh cha ka UP School kawa em hajan.
Ha ki kattu katni ki skur da chem u leh boon ki khynnah wa pep skur wei yeini da phah u ya kiwa sikai kamjooh leh ya ki bei ki pa wow chimkhia ki.
Ha Gambegre UP School da phah u ya ki khynnah wow ong ki ya ki sien (Multiplication Tables).
Ha Daragre UP School da chem u wa ki khynnah man ki wa tlot ha ka Subject Maths.
Wei hapoh ka Project STAR u thooh laad kammon wow pynsuk ya ki khynnah.
Ha Bolchugiri Secondary School won da chem u wa nadooh ki khynnah wa kiwa sikai man ki kiwa tlot ha ka Subject General Knowledge wei da kular u ya ki wow krehchitom wei manda wan biang u sa chisien daw yoo u yei kylla.
Discussion about this post