Ki seiñbhalang kiwa da pynbna ya ka Save Hynñiewtrep Movement ynnne i step ka 1 tarik da lai toor ki cha Secretariat wot hapyrdi i pynkrehkaam ya ka Section 144 Cr.PC ha waroh kawi ka nongbah Shillong wei neiliang ki pulit wa ki Magistrate da khang luti noh ki ya ki seiñbhalang hajan ka yung krehkaam u Superintendent of Police, IGP.
Ki seiñbhalang hapoh ka Save Hynniewtrep Movement da pynbna ki wow saam ya ki kot lakdop cha ki paidbah nadooh Motphran wow yalap ya ini i yakhih hajrong kiwa boon tylli ki phang wa sahteiñ kiwa ktah ya ka jaitbru.
Tangwa neiliang ka Deputy Commissioner yong ka East Khasi Hills da pynbna ko wow pynkrehkaam ya ka 144 Cr.PC yow khanglaad yei yalang paidbah wa palat 5 ngut, iwa da pynman ya ki seiñbhalang wow lai toor cha Secretariat neibynta wow yaklam markhmat wa ka sorkar hajrong ki phang wa ki da rah ki.
Ini i toor ki seiñbhalang man ko leh hadien i tyrwa yong u Symbood Montri Rangbah wa ka dwar yong ka sorkar man ko kawa wai yow yaklam ya kiwon kiwon ki phang næ i e yumut.
Kam wow kdaw heini wa ki bor District da pynkrehkaam ki ya ka Section 144 Cr.PC hadien wa da yoh yutip wa da pyrchang mih ki seiñbhalang ha kiwa boon rukom, khamtam hadien wa da mih i kulmar ha ka tayaw wa da dep.
Puræ leh: Da pynkrehkaam da ka Section 144 yow khang yei lai paidbah ha Shillong
