Ynne ka sngi da ki phaw ngut ki khynroo khyllood wa dooh thaw puræ hadien wa da pyndep yaka SSLC wa HSSLC, da lai toor ki cha ka yung krehkaam ka District School Education Officer (DSEO), West Jaiñtia Hills District hapoh i yahkhmat ka seiñ Jaiñtia Youth Federation (JYF) Central Body.
Hadien wada poi ki ha katai ka yung krehkam sorkar, ki dkhot yong ka seiñ da psiah yaklam ki wa ki sahep hajrong i eh i khoo yong ki khynnah wa dooh thaw puræ.
Kamtæ hadien i yaklam, u L.S. Lyngdoh, Joint Director School Education Literacy, West Jaiñtia Hills da pynche u cha ki khynnah wa ka sorkar ha kini ki por wa dep da chimkhia ko deiwa pynman ya ka yachem yalang ha Shillong, wei da phah leh yaka chnat puræ puthi ka District u chim yukheiñ wa katwon ngut ki khynnah wa yaleh, katwon ngut kiwa chah jied, katwon ngut kiwa da yoh thaw puræ wei katwon ngut kiwa dooh thaw puræ.
Lyngba ini i chim yukheiñ daw rah ko yaka bui (Report) chaka sorkar haka yalang wa daw man, chwa wa ka sorkar u chim ko yei rai.
Hajrong ini da pyntip u wa i kaam da lai ko chakhmat wei neiliang ka JYF leh da phah ko yei pyrtuid yong ki khynnah wa dooh thaw puræ kiwa da em kamwa 70 tam kiwa da e pyrtuid.
Kamte neiliang ka seiñ lyngba u President, u Ombormi L. Tariang, u Dawyoo Lyngdoh, Education Secretary da kyntu ki ya waroh ki khynnah ki wym pu yoh thaw puræ wow pynpoi ki yei pyrtuid yong ki chaka seiñ hapoh 11 tarik uni u bnai khnang waka sorkar deilang waka seiñ u thooh ki yaki laad ki luti.
Heijooh i por ka seiñ kyrpaad joor ko yaka sorkar wow chimkhia lym kamtæ daw mih madan ki deilang wa ki khynnah neibhah la jia wa dooh thaw pure cheiwon u lai ki.
Da kylli haroh ki wa la heini i rukom ki khynnah wym yoh thaw puræ ki, cheiwon ka mynried yong ka imlang sahlang neibhah du i stat i tip donhi wa ye u pynku.
