U MLA ka BJP uwa man leh u Montri ka chnat Labour yong ka jylla, u Sanbor Shullai da lai u wow tuklar hi da idæ yei dawa kiwa kreh Casual hapoh ka skurbah North Eastern Hill University (NEHU), heiwa ynne ka sngi da lai u wow yachem wa ki bor pynlai ka NEHU.
Kam wow kdaw heini wa ki wakreh hapoh ka lama yong ka All NEHU Worker’s Union (ANEHUWU) da pynman ki yaka yakhih wa khlem booh por nadooh ka 1 tarik uni u bnai wow dawa na ki bor pynlai ka NEHU wow thung noh ya ki kam kiwa kreh pura hadien wa da kreh ki katni da ki phaw snem.
Hadien wa yachem wa ki bor wa toh u pait yaka NEHU, u Sanbor da kular u ya kini ki wakreh wow rah yeini chadooh cha Delhi yow pynsñiaw ha u Montri ka chnat puræ puthi, u Dharmendra Pradhan, wei heijooh i por da kyntu u ya ki wakreh kiwa dang pynman yakhih wow lai kreh biang neibhah deiwa pynman yei yakhih daw ktah chooh chooh ya ki neibhah wa chah khatæ ka bainong wa toh u yoh ki man-ka-sngi.
U Montri da ong u leh wa da dep wow yaklam wa ki bor pynlai wym toh u khatæ lane wow ah yaka bainong yong kiwa kreh ha ki sngi wa sangeh kreh ki yow pynman yakhih.
Da ong u wa hei yaklam, da kyntu ya ki wakreh wa toh u pynyoo ki yei eh yong ki samen samen wei hadien itæ ka yung krehkaam daw pynkhreh ko yeiwa emkaam yo lai rah won cha Delhi.
Hawa yaklam wa u President ka ANEHUWU, u Napoleon Mawphniang da ong u wa katni ka Union ym pu ye ki wow chim ya kawon kawon ka rai wow pyndam yei yakhih, tangwa daw yachong chwa da ka yalang yow rai lang.
Hawa yatoh wa ka chithi thung kreh namo ka Appointment Letter, da ong wa ki bor pynlai toh u pynbait ki neibhah kamwa man katni i yaphær da man ko da ki boon snem. Hawa yatoh wa i pynyoo yei dawa, da ong u wa ki wakreh ym em i eh, tangwa da ong u wa hanla ha ki por wa da dep leh da leh tangwa ym jooh em wa ap lane jubab.
