Ka seiñ HNYM West Jaiñtia Hills District ha ka 23 tarik uni u bnai hapoh i yahkhmat u President, u Pynhun Shulet deiwa emlang u waheh chnong ka Ialong, u T. Ram Phawa wa ki dkhot yong ka seiñ da lai yachem ki ya ka Medical Superintendent yong ka Jowai Civil Hospital Ialong hadien wa ka seiñ da yoh ujor ko na kiwa boon ki paidbah hawa yatoh wa i khor ktien ki wakreh kani ka Hospital wa kiwi de kiwa duna hapoh kani ka thaw sumaar.
Ka seiñ deilang wa u waheh chnong da dawa ki wa toh u chna ya u dooid (Side Drain) heiyatoh wa i jhep i jakhlia na kani ka Hospital neibhah i jakhlia wa mih da lai i cha u sarok wa em hajan katai ka Hospital wei kani ka um wa tooid wa mih nei jakhlia katai ka Hospital ye ko wow wanrah chiboon i kjut ya ki paidbah ka jylla waroh kawi.
Da chem leh wa ki paikhana ym em wa pait ki yow pyntikna wa biang ka um wa kiwi wa emkaam yow lait nei sma wei jakhlia.
Da kyrpaad leh naka Medical Superintendent wow wai noh ya ka Gate wa em nadien yong ka Hospital yow yoh u psiah u mih khnang yow lait khynnia i thaw psiah wa nahkhmat kani ka Hospital wei ka seiñ da dawa ko leh wow pynkreh noh chi syndon ya ka Police Booth hapoh katai ka Hospital heiwa da pyntip cha ka seiñ wa ka Police Booth da dep wow chna wei kattu sah neiliang yong ka Police Department wow phah bru noh.
Ka seiñ da ong ko leh ya ka Medical Superintendent wow kyntu ya ki wakreh wow man ki kiwa jai-jai ha ki ktien wa thylliej.
Neiliang yong u waheh chnong da kyntu u ya ka Medical Superintendent yong ka Jowai Civil Hospital Ialong wym toh u noh khiar yei jhep kylleiñ kylleiñ ki thaw wa em chajan ka Hospital wei da kyntu leh ya ki wakreh wow man ki kiwa jai-jai hawa klam wa kiwa wan phah sumaar wa kiwa wan thooh dawai.
Heijooh i por da ong u leh wa man iwa kyrkhu ya ki paidbah yong ka thaaiñ wa da em 2 tylli ki Hospital hapoh ka District nadooh ka MCH wa kani ka Civil Hospital tangwa i tkoh krehkaam ka Hospital da man pathan ko i tim, kamtæ da ong u wa lada kani ka Hospital ym ye ko wow krehkaam deiwa tikna, neiliang yong oo waka seiñ daw lai khang tala syndon ki ya kani ka Hospital.
Neiliang ka seiñ da pyntip ko wa daw lai yachem ko wa ka Health Engineer Wing yong ka sorkar jylla hajrong kiwa boon ki liang wa hap u pyndep ya ki kreh kiwa dang sahteiñ hapoh ka District hi waroh kawi.
