Lai ujor ka JSM cha u DC yei daiñ kuna ki pulit ka Assam ya kiwa chong chnong ka Lapangap

Ka JSM-Lapangap Unit ynnin da lai ujor ki ha u DC ka West Jaiñtia Hills District hajrong i chah pyndik ki paidbah wa sah ha khappood ha ka chnong Lapangap kawa haap hapoh ka Namdong C&RD Block.

Ka seiñ da ong ko wa kini kiwa chong chnong ka Lapangap da hap ki wow pynemkaam ya u sarok Tahpat-Lapangap-Khaduli yow poi cha Khanduli tangwa ha kini ki ar tayaaw ki pulit ka Assam wa em ha uni u sarok da sdang ki wow kynreh ya ki kari yong kiwa chong chnong ka Lapangap.

Kini ki pulit da kynreh ki leh ya ki mar wa kit kini ki kari, da pait da sylli ki leh ya ki License kiwa yah kari, ki kot ki sla kari wei kitu ki wym biang ki kot ki sla da chah daiñ kuna ki Rs. 500 næ Rs. 1000.

Ka seiñ da ong ko wa ini wa leh ki pulit ka Assam toh ha i thaw wa dang haap hapoh ka jylla Meghalaya iwa da ktah joor ya kiwa chong chnong iwa da pynkynmoo ya ki ya ki kaam wa sñiawsih ha ki por wa nachwa.