Hadien wa ood ki paidbah, neiliang ka KSU Lapangap Unit da lai pait ko ya ka Lapangap Government LP School ha ka 3 tarik wei da chem yeiwa sakhiat wei da lai ujor ko ynnin ka 4 tarik cha ka yung krehkaam yong ka District School Education Officer(DSEO), Jowai.
Ini toh hajrong i wym thung thymme ka sorkar ya kiwa sikai ha kani ka skur hadien wa da paan kyrriah kreh (Transfer) kawi na kiwa sikai wei da yoh ko leh ya kani ka Transfer wei katni da em sa du uwi donhi uwa sikai, kamtæ ka seiñ da ong ko wa toh u chimkhia ka sorkar yeini neibhah kani toh du kani donhi ka skur sorkar ha ka chnong Lapangap.
Ka seiñ da pyntip ko leh wa da chem ko wa ya kiwa sikai ha katai ka skur da booh da ki tre chnong ki wym em ya ka kyrdan D.El.Ed lane kiwa da pyndep ya ka MTET.
Hajrong ini waroh, ka seiñ da beiñ joor ko yeini i leh khalær ka chnat puræ puthi ya ka chnong Lapangap, wei ka seiñ ym ye ko wow pdiang yeini neibhah wa emkaam ki khynnah ya ka puræ puthi yow yoh myntoi ki.
