Jowai: Ka Khasi Students’ Union (KSU) Narpuh Circle ynne ka 24 tarik da lai ko wow yachem wa u DC ka East Jaiñtia Hills District u FM Dopth yow paan pynche hajrong i kyntait ka GR Infra Ltd. wow su bai lutsan (Compensation) cha ki tre khyndaw kiwa na Kuliang hadien wa da pynemkaam ya i thaw yong ki da kani ka Company wa chna pynheh ya u sarok NH-6.
Kini ki tre thaw nyngkong pyrchah ki ya ka tai ka Company wow pynemkaam ya i thaw yong ki neidaw wa ym yoh ki yei su bai thaw tangwa kani ka Company da kular ko wow su hadien wa phah ki ya ki tre thaw wow lai mih cha ka yungkrehkaam u DC yow yoh ki yei su. Tangwa da khyrngiat ki tre thaw hadien wa lai mih ki cha ka yungkrehkaam u DC wow dawa yei hok da poi won da ka chithi na u DC wa ka GR Infra Ltd. ka kyntait ko wow su bai lutsan.
Ka seiñ hadien wa yoh ko ya ka ujor na kini ki tre thaw, ynne ka sngi hapoh i yahkhmat u KS Suchiang, President ka seiñ wa kattu katni ngut ki dkhot deilang wa ki tre thaw da lai yachem ki wa u DC yow yoh yei pynche.
Hawa yaklam ki wa u DC da pyntip u wa neiliang ka yungkrehkaam yong oo da yoh pdiang ko yei thoh katai ka Company GR Infra Ltd. wa ka kyntait ko wow su ya ka bai lutsan hajrong ka yurim wa ki tai ki tre ym em mih ki wow ujor ha i por kreh ya u sarok. Tangwa neiliang ki tre thaw da ong ki wa mih hi ki wow pyrcha wei hadien wa ka tai ka Company kular ko wow su, ki tre thaw da chah ki wow kreh ya ki kaam yong ki.
Ka seiñ da ong ko wa ini pynyoo wa kani ka Company ka thmu ko wow pyndooh yei hok wa toh u yoh ki.
Ha i klam ki wa u DC, da kyntu u ya ka seiñ wow lai mih cha ka yung krehkaam ka NHAI wa cha ka Company yow yoh yei pynche.
Neiliang ka seiñ da ong ko wa ym chong kli kti wei daw booddien ko ya kani ka kaam hadooh wa kini ki tre thaw u yoh ki yei hok yong ki.
Discussion about this post