Ka chnong Umdeiñlin wa ki 7 Chnong wa kynthup ya ka Khadkhasla, Psiar, Moolber, Myntang Tihwieh, Pdeiñ Lapateiñ, Tum Tum, Moojem pyllun kiwa jooh haap nachwa ha ka 13-Saphai Constituency, katni won deiwa mynjur ya ka Bill da ka yung dorbar JHADC, ya ka Umdeiñlin da rah cha ka Mowkaiaw Constituency katwa yaki 7 chnong won cha Barato-Mukroh Constituency, kamtæ ynne ka sngi hadien wa da kut ka dorbar kyrpang ka JHADC hajrong ka Bill pynkylla Constituency da lai yachem ki ya u CEM, u Thombor Shiwat yow pynsñiaw hajrong i pteiñ yong ki wow pyrchah neibhah wa kwah ki u neh kamwa jooh man nachwa.
I daw wa ki 7 Chnong kwah ki u neh kamwa jooh man nachwa toh wa katkam i pynbait thymme sñiawthooh ki wa daw maad ki chiboon i eh i khoo heiyatoh wei jngai najrong wa hap ki u lai na ka luti ki jaitbru Karbi.
Kiwa yahkhmat chnong ka Umdeiñlin leh ong ki wa i daw wa pyrchah ki hajrong i chah kyrriah cha Mowkaiaw toh wa da jngai ware ki na kiwi won ki chnong wa haap hapoh kani ka Constituency wei lada pait ki nei rukom man ki thaw leh wym yahaap de.
Wei ha ka dorbar chnong wa da pynman ki ynne i step leh da rai ki wa lada wym poi biang ki kamwa jooh, ye ki u ujor cha ka yung bichaar næ wow dam syndon u chimbynta hei thap Vote MDC.
Hei yaklam ki wa u CEM, da ong u ya ki wa kamwa man kattæ ym ye de u leh iyi iyi neibhah ka JHADC da dep mynjur ko ka Bill wei iwa ye ki u leh toh u phah ki dei thoh cha u Commisioner ka District Council Affairs.
Discussion about this post