Jowai: Ki seiñ ki kari kamai waphær waphær kiwa kamai kari ha waroh ka West Jaiñtia Hills ynne ka sngi hadien wada dep pynman ki ya ka yalang ki seiñ yong ki da lai yachem ki wa u SP ka District yow pynsñiaw yei chtitom wa chem ki man ka sngi.
Da ong ki wa boon ki por du neidaw wa khian wa nai ki Pulit ym maap ki wei da phah su bait ki ya ka kuna heiwa da haap lai ki cha thanat. Da ong leh wa boon kiwa kamai kari Tourist toh kiwa mih na ki thaiñ palat chnong wei ki kari kamai leh toh kiwa duna wei ka sorkar leh ym ye ko u pynbiang kari kiwa kamai cha ki thaw palatchnong wa jngai kamtæ ktah ko ya kiwa kamai kiwa hap su ma su kuna. Ym du ini, ka bai Insurance leh toh kawa da ku kamjooh leh ki kot kari waphær waphær.
Kamtæ ki seiñ kiwa kamai kari da chna noh ki da ka Joint Action Committee Tourist Taxi Association Jaiñtia Hills District wei kani haap ko hapoh ka wi ka lama ki Association waroh kawi ka District. Kani ka Committee toh ka wow pait wow kitkhlieh ya waroh ki seiñ wa kamai kari hapoh ka Ri-loom Jaiñtia.
Neiliang u SP u R. Muthu da kular u wow kitkhia yeini wei daw pyntip u leh cha u Traffic In-charge ka Jowai Traffic Branch.
Neiliang ka JACTTA da kyntu joor ko ya ki driver wa ya ki paidbah u yaichah ki kattu katni sngi hei yatoh wa ini i eh khamtam ya ki khynnah skur kiwa wan na palat chnong.
Discussion about this post