Ka JNC-Western Zone ynnin ka sngi hapoh i yahkhmat u President yong ka, u Hamehi Bamon chirup wa ki kattu katni ngut ki dkhot wa hakhmat ka Western Zone, da lai yachem ki wa u MLA ka Mowkaiaw Constituency, u Nujorki Sungoh wow yaklam ya chiboon ki kaam kiwa yatoh wa ka Block-I wa em ha thaaiñ khapood heiwa nyngkong ka seiñ da yaklam ko heiyatoh wa u sarok cha kani ka thaaiñ kam ka chnong Khadkhasla, Psiar, Mowluber, Skap Mowput, Chnong Thymmei, Mowjem wa Madan Nongkylla.
Ka seiñ da ong ko wa kani ka thaaiñ da chah ieh beiñ ieh khonswet ko nadooh nachwa hadooh kattæ leh neidaw wym yoh ki ya u sarok rong næ u sarok moo. Wei da pynkynmoo leh wa ka sorkar Assam ha kini ki snem kiwa da lai da pyrchang ko wow chna sarok yabor cha kini ki thaaiñ tangwa ha itu i por kini ki chnong kiwa em ha ki thaw khappood da pyrchah joor ki ya ka sorkar Assam wa da mut ko wow chna ya u surok cha kini ki chnong waphær waphær kiwa dang haap hapoh u pood u ang yong ka Meghalaya, tangwa ka sorkar Assam dadep ko wow chna wei dapoi u sarok yong ka hadooh ka Chnong Thymmei.
Ka seiñ lyngba u President yong ka da e ko leh dei thoh heiyatoh wa chiboon i emkaam ka thaaiñ Block-I wei da booh ko leh yei yukylli na u MLA kani ka thaaiñ heiyatoh wa u sarok uwa man kam u budloom yong ka imlang sahlang yong ka roi ka paar wei ka seiñ da yoh ko leh yei ood i naam na kiwa chong chnong yong ka Block-I khamtam heiyatoh wa u sarok.
Neiliang u MLA da ong u wa da yaklam u ya kani ka mat neipor cheipor hapoh Assembly khamtam ya u sarok ka thaaiñ Block-I wei da ong u leh wa ka sorkar jylla hanla ym em ko i bor wow pyndap pynbiang næ wow chna ya uni u surok tangwa da pyrchang ko wow phah kot phah sla cha ka NEC heiyatoh wa uni u sarok.
Ka seiñ da yaklam ko leh heiyatoh wa i bordiñ nadooh ka chnong Mowluber, Skap Mowput, Chnong Thymmei, Mowjem wa Madan Nongkylla wa sñiawsih wa kini ki chnong ym jooh yoh bordiñ ki mynnu mynnu leh hanla da thrang bha kini kiwa chong chnong.
Neiliang u MLA da jubab u wa chem chitom bha ya kani ka bynta, hanla kattæ leh da ong u wa da chimkhia hi u katwa ye wa lah u wow yaklam wa ka sorkar, heiwa ka seiñ da pynsñiaw ko yei sñiawsih wei sñiawkhia hadooh kattæ kattæ hawa pait cha kiwa chong chnong yong kani ka thaaiñ, wei da phylla leh wa kini ki chnong hadooh kattæ wym embynta ki haka Census wei yom jooh em wa wan chim Census ya ki hadooh katni leh.
Kamtæ ka seiñ da ong ko wa ini wa leh ka sorkar man i thij kamwa kheiñ mrad kheiñ bru khloo ya ki pli kini kiwa chong wa sah cha kani ka thaaiñ wei daman ko kamwa pyndooh yei hok longbru manbru yong ki.
Hawa yatoh wa ini, u MLA da ong u wa ka sorkar daw pyrchang noh ko katwa ye wow pynkrehkaam ya ka Census kawa daw sdang naka chnong Mowluber chwa ter ter.
Ka seiñ da pynsñiaw ko leh ha u MLA heiyatoh wa ka Ambulance kawa emkaam bha wow pynyoh cha kani ka thaaiñ kam kawi ka laad wow pynsuk ya ki paidbah.
Hajrong ini waroh, neiliang u President ka JNC Western Zone da ong u wa ka seiñ daw booddien ko neipor cheipor wei ym chong klikti ko heiyatoh wa kani ka kaam yong ka Block-I kamwa dadep hi ko wow e dei thoh cha u MLA.
Discussion about this post