Ka Jaiñtia Youth Development Society (JYDS) ynne ka sngi hapoh i yahkhmat u President yong ka u Damanleki Lathong deilang wa u General Secretary u Kmenlang Ki O Dhar da lai yachem ki ya u Deputy Commissioner ka West Jaiñtia Hills District hajrong i ku palat i dor bai kari kamai.
Ka JYDS hadien wa da yoh ko chiboon i ujor na ki paidbah wa lai wa wan kiwa da pynsñiaw yei eh wa da maad ki nei ku palat i bai kari khamtam ha kini ki por wa duna ka yaw wa ka kamai kajih.
Kiwa yahkhmat ka JYDS da pynsñiaw ki ha u DC wa hadien wa ka sorkar da pyndam noh ko ya i lai kari da ki Odd/Even Number, tangwa da pynsñiaw ki yei sñiawsih wa hadooh katni ka bai kari dang neh ko kamjooh kamwa jooh chim ar chah kam ha i por wa ka sorkar dang phah ko wow pynlai da ki Odd wa Even Number.
Neiliang ka seiñ da kyrpaad ko ya u DC wow chimkhia ya ini i bynta khnang wa ym booh hei eh ya kiwa lai wa wan khamtam ya kiwa dooh wa rangli.
Neiliang yong u DC da pynsñiaw u ha ka seiñ wa daw chimkhia ya kani ka kaam wei da ong u leh wa daw khut ya u District Transport Officer (DTO) yow pynbait ya ini i ku palat ka bai kari kamai.
