Ka Khasi Students’ Union War Jaiñtia Circle ha ka 4 tarik uni u bnai da lai yachem ko ya u DHS (MI) u Dr. A War wow dawa pyndap pynbiang ya iwa emkaam ki PHC wa em hapoh ka Amlarem Sub-Division.
Ka seiñ da ong ko wa hei lai pait wei yaklam wa ki Doctor kiwa pait ya ki PHC waphær waphær hapoh War Jaiñtia, da yoh yutip wa em i tkoh wa i duna ha ki liang waroh. Kamtæ ka seiñ da dawa ko wa neibynta ka Jarain PHC da toh wow thung sa uwi u Doctor neibhah wa kattæ da em du uwi u Doctor, ka wi ka Ambulance kawa chakri ya kiwa kjut wa chitom kiwa wan na ki chnong ki thaw wa em chajan wei da emkaam leh sa ka thaw kha khon hapoh katai ka PHC kawa katni kawa ym em krehkaam.
U DHS da kular u wow pynkreh ya ini i emkaam wow phah sa uwi u Doctor ha Jarain PHC, ka Ambulance leh daw pynpoi sa ka wi yow pynsuk ya ki paidbah yow poi cha ki thaw sumaar wei daw phah leh sa 2 ngut ki Nurse ki wow yarap ha ka thaw kha khon heiwa u DHS da phone u leh cha u DMHO ka West Jaiñtia Hills District wow pynsmat ya ini i kaam.
Hawa yatoh waka Pdengshakap PHC leh da kular u wow pait ya iwa emkaam deiwa yaroh ya u Doctor uwa da kreh chitom samen.
Ka seiñ da pyntip ko leh wa hei thooh yutip ko ya i rukom krehkaam ka Ambulance ka Dawki PHC, da yoh yutip na u Doctor wa pait ya kani ka thaw sumaar, wa uwa yah ya katai ka Ambulance ym jooh wan kreh wei u wym ap yeiwa phah ki Doctor, kamtæ hajrong ini da dawa na u DHS wow pyndooh kaam noh ya kam kini ki bru wei wow thung da kiwi.
Heiyatoh wa ini leh u DHS da kular u wow chimkhia wow pynchitom ya kam kini ki bru kiwa chim tulop khlem lai kreh, wei daw chim ya ka Report na u Doctor wa na u DMHO.
Ka Khasi Students’ Union War Jaiñtia Circle da e khublei kyrpang ko ya u DHS(MI) u Dr. A. War uwa da kular u wow chimkhia wow pynbha pynbiang ya ki thaw sumaar kiwa em ha waroh kawi ka Amlarem Sub-Division.
Ka kyrwoh na u General Secretary u Lurman B. Talang.
