Kiwa yahkhmat ka seiñ Ri-Jaiñtia Youth Federation (RJYF) Chyrmang Unit hapoh i yahkhmat u President u Yoobiang Shylla, u Secretary u Rimiyoo Shylla wa u General Secretary ka Central Body u Ebormi Pale da lai yachem ki ya u DMHO West Jaiñtia Hills District ynne ka sngi wow thooh yutip hawa yatoh waka Sub-Center kawa em ha ka chnong Chyrmang.
Ka seiñ da ong ko wa yaka yung krehkaam da dep chna la san snem chiteiñ wei da pynphylla ko ya kiwa chong chnong wa hadooh kattæ ya kani ka Sub-Center ym em krehkaam ko.
Neiliang yong u DMHO da pyntip u yaka seiñ wa waroh iwa emkaam yong kani ka Sub-Center da biang lut wei iwa sah toh du wow pynmih yaki Post, kawi ka Post Chowkidar wa kawi ka Post yong ka Nurse.
Da pyntip u leh wa da dep wow yaklam wa kiwa hajrong wow pynmih ya kini ki Post wei hadooh katni ka sorkar ym em leh ko ya ini.
Kamtæ neiliang yong ka seiñ da kyrpaad joor ko yaka sorkar wow smat ko wow pynmih ya kitai ki Post khnang wa kiwa chong chnong u suk ki manda em i kjut i chitom neibhah wa ym em ki ya i thaw sumaar wa em hajan hadooh katni, pynkut ka kyrwoh na u President yong ka Unit u Yoobiang Shylla.
