Ynne ka sngi ki ar tylli ki seiñ ka JSU (Jowai Circle) waka JYF (Central Body) ha i yahkhmat u Aplang Lamare, President JSU Jowai Circle, u Dawyoo Lyngdoh JYF (Central Body), Secretary Education, u Chemphang Shylla, Secretary JSU Jowai Circle wa u Oswald B Nampui, President JYF (Asst. Organising Secretary) da lai ki cha Government Boys’ Higher Secondary School wow yaklam wa ka Principal heiyatoh wa ka Admission yong ki Class-XI (Arts) heiwa hadooh katni da em kamwa sa 500 tam ki khynnah puræ wa kynthup na waroh ka ri-loom Jaiñtia ki wym pu em u yoh thaw puræ (Admission) hadooh katni leh.
Ki ar seiñ da ong ki wa boon ki khynnah wa jooh puræ cha baar ka jylla kamjooh kiwa jooh puræ ha Shillong, katni da chem chitom ki wow lai biang cheite neidaw wa leh ka khlam COVID-19, kamtæ boon ki khynnah kiwa thooh thaw puræ ha ka ri-loom Jaiñtia khamtam kiwa dooh wa duk kiwa pyndap Admission ha ki thaw puræ sorkar wa hadooh katni ym pu em yoh thaw puræ ki haka Arts Stream.
Da ong leh wa ha Kiang Nangbah katni dadep e thaw puræ (Admit) ya ki khynnah kamwa 450 tam wei dang sah sa kamwa sa 400 ngut ki khynnah ki wym pu em u mih pyrtuid. Ha Kiang Nangbah katkam wa yaklam ki seiñ waka Vice Principal da pyntip ko cha ki wa da khynnia bha neidaw wa da boon bha ki khynnah wa da pdiang ki.
Kamtæ ki ar seiñ da ong ki wa ha Government Boys’ Higher Secondary School da chim du ya 75 ngut kiwa dang wan thymme wa 25 ngut kiwa ym em lait haka Class-XI ini wa dep. Neiliang ka Principal yong kani ka skur da ong ko wa chem chitom ki wow pdiang chiboon ngut neidaw wa em du uwi donhi uwa sikai ha kawi ka Subject tangwa hanla kattæ leh ka Principal yong kani ka skur da ong ko wa daw chong pyrkhat ko wa ka Admission Committee yong kani ka skur wow pyrkhat lang ki hajrong ini wa dooh thaw puræ ki khynnah, wei daw e jubab ko ya ini i kyrpaad ha ka tayaw wa daw wan.
Ki ar seiñ da pyntip ki leh wa ym em yoh ki wow yachem waka Principal ka Government Girls’ Higher Secondary School neidaw wym em chait bha ko wei daw lai yachem won.
Ki ar seiñ da ong ki wa hadooh katni da em du 3 tylli don hi skur Higher Secondary ki yong ka sorkar, kamtæ da ong ki leh wa lada ki Principal ym chimkhia ki hajrong ini, daw lai kynjoh ktien ki cha ki bor wa hanien yong ka chnat puræ puthi wow e laad ya ki khynnah u yoh thaw lai puræ ki ha kawon kawon ka skur, kamjooh da ong lada ka sorkar ym chimkhia ko hajrong ini i kaam, daw chim da kiwi tawon ki laad ki luti.
