Jowai: Ki le tylli ki seiñ wa kynthup ya ka Federation Khasi Jaiñtia and Garo People (FKJGP) Jaiñtia Hills, Jowai Traders Association (JTA) wa ka Jaiñtia Tribal Traders Association (JTTA) da lai yachem ki wa u CEM ka JHADC u ma T. Shiwat hei yatoh wa i slem u pyndep ya ka Shopping Complex ha Jowai.
Ha kani ka yachem, u CEM da ong u wa ka council ym em chongklikti ko wei dang kani ka tayaw wa dep ka EC yong oo dang wan ki na Delhi yow yachem wa u Secretary ka DONER u Nevin Verma yow pyllait noh ya ka 2nd Installment neibhah khlem yoh ya kani ka poisa daw sah i kreh.
Da ong u leh em i ya sñiawthooh bakla wa ka sorkar jylla heiwa ya ka poisa 2nd Installment da paan ko katkam ka rukom chna wa da mang nadooh nawa sdang tangwa yei rukom man kani ka Shopping Complex da pynkylla ya ka nadooh wa da chimkti ka PWD wow chna ya ka wei hadien wa mih ka aiñ MUDA Building Byelaw, kamtæ da sahkut kani ka poisa neidaw wa ya phær i dor wa paan ka sorkar jylla wa ka JHADC.
Ha kani ka sngi da yaklam leh hei yatoh wa ka rukom e Trading License heiwa neilaing u CEM da ong u wa ki bru ka JHADC da sdang ki u pynman ya ka takit cha ki dukan wa suba wa leh Benami wei ym em de e ki ya ka Trading License cha ka barjylla.
Kamwa man kattæ da e du ya ka Temporary Clearance Certificate (TCC) cha kiwa kreh wa wan na bar jylla ym toh ya kiwa seiñ khih.
Discussion about this post