Lai yachem ki manbei manpa ya u Dolloi ka Elaka Jowai kamjooh ya u DC ka WJH hei yatoh wa ki kaam chnong hapoh Ummulong

Jowai: Hadien wa mih ka khubor hei yatoh wa i wym biang wa i rukom krehkaam ka scheme 100 sngi kawa tip leh ka MGNREGS kamjooh leh i wym sñiawsuk kiwa chong chnong ka chnong yei rukom krehkaam u Waheh Chnong yong ka u S.S. Langi ynne ka sngi ki manbei wa ki manpa da lai yachem ki ya u Dolloi ka Elaka Jowai, u DC ka WJH wa ya ka Administrative Officer ka JHADC.

Ynne ka sngi ki manbei manpa dei mynsien wa khia da lai yachem nyngkong chwa ki ya u Dolloi ka Elaka Jowai, u Puramon Kynjing heiwa da e ha oo ya ka dorkhat pyrchah ya u Waheh Chnong wada soi da palat ar spah ngut kiwa chong chnong chynrang wa kynthai.

Ha ka Dorkhat da pynbaad wa u Waheh Chnong ym em man u uwa biang hei pynkrehkaam ya ki kaam ka chnong kam heipor walai paan kot paan sla ki kam ki Certificate, da leh chilliang khmat u wa kiwi kiwi heiwa da kyrpaad ki ya oo wow leh yeiwa emkaam hei yatoh wa ini kam u khlieh ka Elaka.

Hadien ini da lai yachem ki sa ya ka Administrative Officer ka JHADC ha kamra krehkaam yong ka hei yatoh wa ini i jooh hi i kaam, neiliang yong ka Administrative Officer wa u Dolloi ka Elaka da kular ki wow chimkhia ya ini, wei wow pynman ya i takit wa bniah hei yatoh wa ini.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ha ka jooh ka sngi kini ki manbei da lai yachem ki sa ya u DC ka West Jaiñtia Hills u R. Rapthap ha kamra krehkaam yong oo heiwa da pynap pynsñiaw ha oo ya i eh i khoo wa mih hapoh ka chnong nadooh wa mih pyrthai ki kaam wym biang i pynkrehkaam ya kani ka scheme 100 sngi hapoh ka chnong.

Ha i yachem wa u Rapthap da e leh ya ka dorkhat heiwa da ujor pyrchah ya u Langi wei da kam ki wa ynne ka 29 tarik da pynman sop sop ya ka Social Audit heiwa ki paidbah ymtip ki yeini neibhah wa da pynman ya ka khlem ka wyrta næ pyntip paidbah.

Da kyrpaad joor ki leh ya oo wow pyllai bait ya kani ka Public Hearing ha kani ka 6 Naikhynde khnang wow mih pyrthai i hok ki paidbah wei wow chem yeiwa sakhiat. Hei yatoh wa ini neiliang u Rapthap da kular u ya ki wow chimkhia yeini wei wow pyntikna u wa kani ka Public Hearing u man ko kawa lai bait lai ryntih.