U Montri Rangbah ka jylla u Conrad K. Sangma deilang wa u Symbood Montri Rangbah u Prestone Tynsong ynne ka sngi da yachem ki yaka Union Finance Minister ka Nirmala Sitharaman ha New Delhi yow e dorkhat yow dawa naka Ministry of Finance yow pynchlur yaki National Bank yow booh ki hakhmat yow wai chnat wa thymme ha ki thaw wa em cha palat sor wei yow pynkhlan leh yei krehkaam yong ki hapoh ka jylla.
U Conrad da e u yaka dorkhat yow kyrpaad naka sorkar pyrdi yow pynboon ya i bhah naka sorkar pyrdi wa yoh lyngba ki dan yong ka. Da yaklam leh yaki kaam poisa poilaiñ ka Meghalaya.
Hadien wa yachem waka Union Finance Minister, u Conrad wa u Prestone da yachem ki leh ya u Minister of State, Finance u Anurag Thakur yow yaklam yaka luti wow lai chakhmat yow pynyoh poisa naka World Bank wa kiwi kiwi neibynta wow pynkreh ya ki kaam pynroi hapoh ka jylla. Da wanrah u leh ya ki 3 tylli ki kaam heiyatoh wow pynbha pynmiat yaka kaam sumaar sukher, ki kaam uiñke suwari kamjooh ki sarok hapoh ka jylla.
Da yachem ki leh ya u Union Minister for Animal Husbandry, Fisheries and Dairying u Giriraj Singh yow yaklam heiyatoh wa ki kaam ri masi, sniang wa ki dakha yow pynku yaka yoh ka kot.
Hadien ini da yachem leh ya u Minister of State Heavy Industries and Public Enterprises u Arjun M Meghwal yow yaklam yei wanrah ya ki kari wa pynekaam da i bordiñ khamtam hawa lai luti kiwa jan kam ki kari kamai.
Khaddooh da yachem ya u Union Minister for Minority Affairs u Mukhtar Abbas Naqvi yow pynsñiaw yei sñiawngooh yei yarap poisa yow chna yaka P. A. Sangma Stadium ha Tura. Heiwa neiliang u Conrad da khana u wa da sdang wow khut Tender wei i kreh daw sdang noh i ha kini ki chibnai chiteiñ.
Da yaklam leh yow sdang yaka Training Centre neibynta ki wakreh kam ki Paramedical hapoh Meghalaya, kawa daw man leh kam ka chlem wow e sikai ya waroh kawi ka thaaiñ North East. “Deiwa pyrkhat yei long i man u COVID-19 katni, da emkaam wow pynkup yei stat yow yoh bru wakreh kiwa pliah yow pynkhlan ya i kaam sumaar sukher hapoh ka thaaiñ”, da ong u Montri Rangbah. Nalor kani ka Institute, u Conrad da yaklam u leh yow paan yaka Auditorium ha Tura.
U Montri Rangbah da pyntip u leh wa kini ki yachem wa ki Montri ka sorkar pyrdi man ki kiwa em kyrmen kiwa da kular ki wow chimkhia ya ini waroh.
