Shillong: Ki ar ngut ki MLA yong ka Bharatiya Janata Party (BJP), u AL Hek wa u Sanbor Shullai ynne ka sngi da lai ki wow pynkynmoo biang ya u Lat ka jylla, u Satya Pal Malik ya waroh ki phang wa emkaam hakhmat dooh ya ka jylla.
Katkam ka khubor wa da yoh, u Lat ka jylla ye u wow mih ha ka 19 tarik uni u bnai yow lai cha Delhi neibynta wow yaklam yei dawa Inner Line Permit (ILP), wei wow mynjur noh ya ka Meghalaya Residents Safety and Security (Amendment) Act.
Hawa klam cha ki laad pathai khubor, u AL Hek uwa man leh u Montri ha ka sorkar jylla da pyntip u wa i yaklam man bait i hajrong i emkaam jhan ka jylla katni, khamtam hawa yatoh wa i dawa ya ka ILP, khnang wa u Lat yow pynsñiaw u hakhmat u Montri Rangbahdooh ka ri wa ha u Montri Kaam Pohyung u Narendra Modi wa u Amit Shah.
U Sanbor Shullai, da pyntip u wa u Lat daw chong rap slem u ha Delhi wei neidaw wa u Lat uwa katni man u uwa smat wow ya krehlang wei wow ap, neiliang ki MLA da lai ki wow pynkynmoo, heiwa da pyntip u wa u Lat ap bha u chaphang kini ki phang wa emkaam ha ka jylla.
U Shullai da pyntip u leh wa kam kiwa mihkhmat da pynsñiaw leh yei eh wa ka skurbah ka North Eastern Hill University da maad ko neidaw wym em u Vice Chancellor wa pura, wei da pyntip u leh wa neiliang yong ki da pynsñiaw ki ha u Lat wow thung noh ya ka VC wa pura ha katai ka skurbah da ka manbei kawa na ka jylla.
Ha i jooh i por neiliang kini ki MLA da pyntip ki wa da pynsñiaw leh ha u Lat wow yaklam yei tipmit noh ya i ktien Khasi wa Garo ha ka 8th Schedule ka Riti Synchaar ka ri India.
Hawa kylli, u Sanbor da ong u wa neiliang ki MLA ka Party daw booddien ya kini phang yow ye u pynmankaam hawa ki leh daw yachem ki wa kiwa yahkhmat ha Delhi.
