Lait im biang u PN Syiem sa chisien

Shillong: Ka kaam saiñ pyrthai ha Khasi Hills Autonomous District Council (KHADC) da khih bha ko ynne ka sngi hadien wa ka liang pyrchah wa kynthup ya ka UDP wa ka HSPDP nalor ki MDC samen, da pyrchang ki wow pynhaap noh ya ka Executive Committee kawa yahkhmat da u Pynshngain N Syiem hajrong wa pynbaad wa u CEM da chim kabu u wow pynyohnong ya ka party thymme yong u ka People’s Democratic Front (PDF).

Ka liang pyrchah da dep thoh ko cha u Secretary ka Legislative, u A. Shangpliang chwa wow sdang ka dorbar yow pynsñiaw yei wym chaniah ya ka EC u Pynshngain tangwa da pynsangeh chwa ya ini wa ye ko u ktah ya ka dorbar mang tyngka.

Chwa wow sdang ka dorbar, u Chairman u LG Nongsiej da pynbna u ha ka yung dorbar wa ya ka No Confidence Motion kawa da booh wow wanrah ynne ka sngi, da pynsangeh da u wa yahkhmat ka ka UDP u Teinwel Dkhar. Ini i pynsangeh noh chwa ka liang pyrchah da pynkmen ko ya ka liangsynchar heiwa da thap ki ya ki miej kam i dak kmen.

Hawa klam wa kiwa thoh khubor hadien wa pyndam yei wanrah ya ka No Confidence motion, u Parliamentary Party (PP) Leader ka UDP u Teinwel Dkhar wa u MDC ka Sohryngkham, u Pyniaid Sing Syiem, da ong ki wa kwah ki u elaad wow mynjur chwa ya ka mang tyngka ka Council.

Related posts

Ym yoo deiwa em ka VPP daw man ko iwa eh ha ka Election MDC: Sniawbhalang

November 2, 2024

Cha Mumbai, Bengaluru wa Hyderabad pynkhreh ka sorkar wow pynhær lieñsuiñ na Umroi

November 1, 2024

Katkam i ong yong ki, da pyntip wa ya ka No Confidence Motion daw wanrah noh da ka Teilinia Thangkhiew ka MDC ka HSPDP ha kini ki sngi wei da kyntait leh da pyndam noh ya ka No Confidence Motion.

Ha iwi won i liang, u CEM ka KHADC, u Pynshngain da kam wa i pynsangheh ya ka No Confidence Motion toh wa ka liang pyrchah ym em ki yei boon paaid katkam wa kam ki.

“Nga man O uwa da pynkhreh lada wan i pynyoo bor neibhah ka PDF hapoh i yahkhmat yong nga dang skem ko” da ong u CEM.

Kamwa man kattæ i em ki MDC ha ka liang pyrchah toh 13 ngut, wa kynthup 4 UDP, 3 HSPDP, 6 Congress, 1 MDC samen, katwa neiliang synchaar em ki 15 ngut, wa kynthup 10 ngut ki MDC samen, 1 NCP, 1 BJP, 2 UDP, 1 HSPDP, katwa ka KHNAM ka dang sah ko hapyrdi hadien wa u MDC yong ka, u Adlbert Nongrum ympu ye u e ya ka rai.