Jowai : Kawi ka man yung wa em ha Khliehriat West, East Jaiñtia Hills District da chem ko i jia wa sñiawsih heiwa da kop diñ i yung ki chiteiñ synyaw yong ka miet 28 tarik tangwa embhah ym em wa mynsoo.
Kani ka yung toh yong ka Diana Mary Nongtdu wa sah ha Khliehriat West, East Jaiñtia Hills District.
Yei daw wa kop diñ kani ka yung da suba toh na u mombati wa thang u khynnah wa chong kreh waka kong Diana heipor wa pleh light 9 waje heipor bam ja miet.
Katkam ka yutip wa da yoh na ki tre yung da khana ki, wa heipor wa jia da em du u khynnah wa yakreh wa u khon ka Mary uwa 5 snem i rta kiwa dang bang thiah katwa ka Mary wa u kurim ko dang em ki ha luti na Shillong cha Khliehriat.
Da ong wa i diñ wa da sdang ko u kop na yung chetja wei da poor ko cha waroh ki kamra yung najrong saad, embhah won wa heipor 1 waje i synyaw em ki jan yung wa yoo yei tdem te lai kyrsu ki ya kini ki khynnah wa yohthiah ki tæ lait ki nei mynsoo, wei ka saad yong ka kamra wa thiah ki leh da yoh hi ka diñ u kem.
Hadien ini ki paidbah da yaleh ki u pynpleh yei diñ wei neiliang ka Fire Emergency Service leh da poi i yarap pynpleh diñ ki.
Iwa pynkhyrngiat ya kini ki chi kurim toh wa mynda poi yung ki 2 waje i step synyaw chem ki wym hoi de ka yung ki u chong u sah neidaw wa da baam lut i diñ chapoh.
Waroh i kamra hapoh yung da iñ lut i nadooh ki tiar ki that ki nep, khamtam haka yung chetja wa kiwi kiwi.
Ha ini i jia da antaad wa da lut kamwa ym duna yaka T. 5-6 lak.
Discussion about this post