Uwi na kiwa dadep chah rai pynrem ha ka yung bichaar uwa emkti wow pynyap ya uwa yalap niam Christan uwa na Australia uwa tip kam u Graham Staines deilang wa ar ngut ki khon chynrang u iwa da jia ha u snem 1999, ynne da yoh u wow mih patok hadien 25 snem wa kset ya oo ha Keonjhar Jail ka jylla Odisha.
U Mahendra Hembram uwa em katni 51 snem i rta katni (20 snem haroh heipor wa chah kset u) deilang wa u Rabindra Pal Singh uwa tip leh kam u Dara Singh heiwa da thang ki ya kari u Graham deiwa emlang ki khon khian u hapoh iwa da jia ha ka jylla Odisha, wei ini da wanrah ko yei chrai ha waroh kawi ka ka ri heiwa ya u Hembram da kem ya oo ha ka 09-12-1999 katwa ya u Singh won ha ka 31-01-2000 napoh iwi i khloo.
Yei daw wa pynlait ya u Hembram toh wa da emsalon u, wei heipor wa mih u napoh patok da ong u wa da chah pynbaad bakla u du neidaw wa pyrchah u yei pynkylla niam ya ki bru wei wow pynyap masi.
Ha ka 19-03-24, ka Supreme Court ka ri da phah ko ya ka sorkar ka jylla Odisha wow chim ya ka rai wow pynlait chwa wa toh i por ya u Hembran katkam wa da chem ka Odisha State Sentence Review Board katkam ki kyndon wow pynlait ya ki koidi kiwa dadep chah kset 14 snem.
Najrong u Hembram da em leh 30 ngut kiwi kiwa da chah rai pynrem ha kiwi won ki kaam da yoh ki wow lait na patok.
Kam wow pynkynmoo wa u Graham deilang wa ki ar ngut ki khon u, kitæ u Timithy (6 snem) wa u Philip (10 snem) da chah thang pynim ki hapoh ka kari ki ha chnong Manoharpur, Keonjhar District hei miet ka 21-01-1999 wei ini da jia neidaw wa chah pynbaad pynkylla niam ki.
Heiyatoh wa ini i kaam, da em 51 ngut ki bru wa da chem kem nadooh u 1999 hadooh u 2000 heiwa 37 ngut da lait ki nei chah pynchitom hapoh le snem wa pynman yei bichaar. Ha ka 22-09-2003, ka yung bichaar ka CBI da rai pynrem ko ya u Dara Singh deiwa phah pynyap oo (Death Sentence) wei da phah kset waroh chi rta ya ki 12 ngut kiwi katwa uwi won uwa dang man hapoh 18 snem i rta da bichaar ya oo da ka Juvenile Court. Tangwa na ki 12 ngut won da pynlait ya 11 ngut da ka Orissa High Court lait noh u Hembram wei da pynkylla leh ya ka hukum pynchitom ya u Dara Singh nei phah pynyap chei phah kset waroh chi rta.
Discussion about this post