Lait salit ki kari nei chah kawang Petrol Bomb ha ki le tylli ki thaw ha Shillong

I chah kawang Petrol Bomb ha ki le tylli ki thaw iwa da jia heipor pyrdi synyaaw ynnin wa ynne i step synyaaw ha Shillong, ym em da chah ktah da iwa joor næ kiwa mynsoo.

Ha i jia wa nyngkong iwa heipor 11:39 i miet, ki pulit da pyntip cha ki wa em i kawang Petrol Bomb ha ka yung krehkaam ka Meghalaya Government Construction Corporation (MGCC) iwa da pyntip da uwa yang miet heipor 1:00 waje i step synyaaw, heiwa da khana u wa em ki damok kiwa kawang Petrol Bomb ha kani ka yung krehkaam, tangwa ha itai wa jia ym em i chah ktah iwa joor lait noh i piah ki yit.

Katkam wa da yoh riñ da kawi ka CCTV, da yoh u yoo ya ar tylli ki kari wa pynyieñ ha pchem kani ka yung kiwa da lait salit neibhah u Petrol Bomb da kopdiñ donhi ka that tangwa ym em piah u klong uwa da haap pyn hadien kini ki kari.

Iwa jia wa bood won toh ha Rynjah Police Station, heiwa yeini da pyntip da jia heipor 2:40 i step synyaaw katwa ki pulit wa em Duty da mih lai uiñ sonteri ki ha katai ka thaaiñ, wei syndet syndet ki damok wym ye u tipmit da kawang Petrol Bomb ki chapoh pchem ka Police Station, wei heitai i por da em uwi uwa yang miet wa ar ngut ki pulit SF 10 kiwa da ye u tympleh noh yei diñ.

Related posts

Da chim ya ka Statement u pulit wa yah ya ka kari wa ya tyrrah wa ka thuk-thuk

November 24, 2024

Thung ka sorkar da ka Committee yow pynthymme noh yei rukom krehkaam ka MPSC

November 24, 2024

Iwa jia won ha Sadar Police Station toh heipor 2:50 i step, heiwa da khana wa ki damok kiwa em kajiak ngut da kawang ki ar tylli ki klong Beer wa da thap ya i kynja umphñiang iwa da kop diñ da i thmu wow thang ya ki kari kiwa da pynyieñ hajan ka pchem tangwa i diñ ym em poor i wei ym em iyi iyi i chah ktah ki kari.

Neiliang ki pulit da pynman ki yei takit hajrong itai i chah kawang Petrol Bomb, wei da wan leh u Superintendent of Police (City) uwa da lai pait ya kitai ki thaw wa chah kawang Petrol Bomb.

Neiliang u Deputy Commissioner ka East Khasi Hills, u SC Sadhu da khana u wa ki bor District wa ki pulit da paitbniah ki yeiwa jia wei daw pynkhlan leh yei uiñ sonteri heipor miet.

Chooh chooh da khana u wa neiliang ki bor wa toh u pait da phah ya kitu kiwa pynemkaam ya ki kari sorkar wow man ki kiwa syndong wei wow pynyieñ kari ha ki thaw kiwa chngaaiñ yow lait na iwon iwon i jia.