Kam chibynta wow pynsñiawthooh paidbah hajrong ka National Tuberculosis Elimination Programme (NTEP) wa i sdang ya ka Pradhan Mantri TB Mukt Bharat Abhiyan (PMTBMBA), lyngba ka Corporate Social Responsibility (CSR) ka Star Cement Ltd chirup wa ka yung krehkaam ka District Tuberculosis Officer, Jaiñtia Hills District, Jowai ynne da saam ya ki baam hapoh ka Community Support Scheme for TB Patients ha Khliehriat Civil Hospital, East Jaiñtia Hills District.
Neiliang ka Dr. E.B.V. Laloo, District Tuberculosis Officer da ong u wa ka kjut TB toh kawa ye u poor na uwi cha kiwi ki bru lyngba i yinhaaw hadien wa ky’oh namo deiwa synrieh kamtæ emkaam bha ya kiwa yoh TB wow sap Mask ki. Da ong ko leh wa lada ym dih dawai TB dei langær, ye bha i kjut wow poor cha kiwi tawon.
U K.K. Borah, Deputy Manager, CSR, Star Cement Ltd hawa e yei klam da ong u wa lyngba ka CSR da e i baam wa tei (Nutritional) heiwa daw e baam ya ki 100 ngut kiwa yoh kjut TB hapoh ka District neibynta u Duyatra (Jan), Thohlakhmi (Feb) wa u Wisu (Mar) 2023. Da kyntu u leh ya kiwa kjut TB wow baam deiwa tei wa kamjooh leh wow dih ya ki dawai TB katkam wa phah u Doctor.
Neiliang u Dr. Dominic Shylla, ka Dr. E.B.V Laloowa u K.K. Borah da saam baam ki leh kam i dud, pylleiñ, u khoo, i phñiang, wa ka borti wa cha kiwa kjut TB.
