Ka 7-Thyndai Child Care Institute Cum Counselling Centre (Shelter Home) wa em ha Tuber Kmaichnong, East Jaiñtia Hills District kawa pait wa pynlai daka Seiñraij Tuber Women’s Wing, da khynjooh ko 5 snem pura i lai luti hei wow e i chakri neibynta i bha i miat ki khynnah khonswet wa sah ha kani ka thaw.
Kamtæ kam chibynta i dap san snem i lai luti, ha ka 24 tarik uni u bnai, ka Seiñraij Tuber Women’s Wing da pynman ko yaka yalang pynem burom ha pchem kani ka thaw ri khonswet, heiwa u Montri ka chnat Social Welfare ka sorkar jylla, u Kyrmen Shylla da man u kam u kongsan.
Da emlang leh ha kani ka sngi u Dy. CEM ka JHADC u Lasky Rymbai, u Finlyness Bareh, MDC ka Rymbai, u Abhilash Baranwal, DC ka East Jaiñtia Hill, ka R. Passah, District Social Welfare Officer EJH, u T. Kyndiah, District Child Protection Officer, EJH, ka Voilet Lyngdoh, MDC warim ka Rymbai, u Puramon Kynjing, Dolloi Elaka Jowai, u Streamly Suchen, President KSU-EJH, u Damewanhi Rymbai uwa naka chnong Wapung Skur kiwa mihkhmat naka Art of Living, kiwa kitkam ka Seiñraij Tuber nadooh ki waheh wasian, neitæ ki Chairman, Secretary yong ki chnong waphær waphær wa kiwi de.
Ki khynnah skur wada emlang ha kani ka sngi da chimbynta ki hei yakob yaleh Drill, dro dur, chaad tynre, yataan tylle, ya rwai wa kiwi kiwi.
Haka yalang wa pynlai daka Chairperson, ka Chemsuk Dkhar, neiliang ka Faithtis Ryngkhlem Secretary, da khana tbian ko heiyatoh i lai luti ka Women’s Wing nadooh u snem 2006, wei hadien 11 snem da ye ko u sdang i e chakri kyrpang yaki khynnah khonswet itæ toh ha u snem 2017.
Da pynkynmoo haroh ko wa ya ka JJA Certificate da yoh ki haka 24-08-2017, katwa yaka 7-Thyndai Child Care Institute Cum Counselling Centre won da wai yaka haka 15-12-2017.
