Kamwa ha chityllup ka pyrthai, ya ka 1 tarik u Naichiphaw da kynmoo ya ka kam ka International Day of Older Person næ ka sngi leh burom ya ki bru wada heh rta, kamtæ neiliang ka yung krehkaam ka District Social Welfare Officer, West Jaiñtia Hills District, Jowai leh ha kani ka sngi da pynman ko i leh burom kyrpang ya kani ka sngi ha Community Hall ka chnong Ummulong deilang i wan chimbynta ki paaid wa chong chnong wada heh rta.
Ka District Social Welfare Officer, Jowai ka J. Synnah hawa pynsñiaw yei yumut yong kani ka sngi, ong ko wa neiliang ka sorkar da lehburom ko ya kani ka sngi toh yow pynyoo i sñiawngooh yei yi wa kiwa da heh rta da leh ki heiyatoh u wanrah i roi i paar haka yung ka sem wa haka imlang sahlang.
Da khana haroh ko wa hawa kheiñ ya ki bru wada heh rta toh 65 snem ya ki chynrang wei 60 snem ya ki kynthai.
Neitæ katkam ka phang yong uni u snem kawa ong “Digital Equity for All Age”, mut ko wa waroh i rta ye ki yoh myntoi lyngba ka juk stat Information Technology, kamtæ wot kiwa da heh rta leh ym em iwon iwon i khanglaad wow pynemkaam ki yei stat ka juk wa katni, da ong ka Synnah.
Da pynsñiaw haroh ko ya ki Scheme waphær waphær wa kiwa da heh rta ye ki u chim kabu, najrong wa pyntip leh wa em ka aiñ wow pynchitom ya ki khon wa lehbeiñ ya ki bei ki pa.
Heiyatoh u pynyoh i chait i khiah neibynta kiwa da heh rta, u Dr. S. Sumer Medical & Health Officer Ummulong CHC da kyntu u ya kiwa da heh rta wow lai li mih cha ki thaw e sumaar sorkar neibhah kamwa man kattæ ka chnat yong i chait i khiah da chna ko boon ki Health and Wellness Centre wei ka thong wa hakhmat dooh yong ki toh u pait yei chait i khiah kiwa da heh rta.
Khana u wa ki bru wa da heh rta boonsien hi rap yoh ki yei kjut kongsnam, Stroke, BP, khai tlot wa syndet syndet, kjut chini, syuiñ, kjut khmat wa kiwi de.
Kiwi won wa e i klam kynthup ya u waheh chnong Ummulong u L. Laloo, ka N. Sutnga UDA, DSWO, Jowai wa kiwi kiwi.
Ha kani ka sngi da em leh i e sñiawbha cha kiwa wan chimbynta.
