Kamwa man ha kiwi ki thaw ka ri India, ka Loomkyrwiang Dorbar Chnong, Jowai leh ynne da pynman ko yei leh burom ya ka Independence Day nae i yoh laitlooid ka ri nei synchaar mynder heiwa ki khon ka dorbar chnong nadooh ki khynnah hadooh ki waheh wasian da wan ki wow ya chimbynta.
Neibynta i burom ka dorbar chnong, u Lammat Oo Laloo, Waheh Chnong ka Loomkyrwiang kam wow kdaar luti ya ki bynta wa chakhmat da pynhær u ya ka lama wei pynbood won i rwai yei sur National Anthem da waroh kiwa ya embynta wow sakhilang.
U Daioolang Pakma, Symbood Waheh Chnong kam u chongknor yong kani ka leh burom da e u ki kyntien yahkhmat deiwa kynmoo leh ya kiwa yaleh laitlooid wa khroo ka ri India wei kyrpang leh yow Woh Kiang Nangbah khlawait ka Ri Jaiñtia uwa da kheiñdooh yei mynsien neibynta ka ri wa ka jaitbru kat hadooh wow tkut i mynsien yong oo ha u tylle pasi ka sorkar pharæng iwa da jia ha ka 30 tarik Kmaichonglad 1862.
U Lammat Oo Laloo hawa e kyntien næ khubor Independence Day hapyrdi ki khon ka dorbar chnong, ong u im i ha kani ka juk ka por kawa da yoh i yei laitlooid tangwa kam kiwa chong chnong won emkam u tip i wow pynemkaam hok yei yoh laitlooid yong i.
Chooh chooh ha ka thong wow wanrah yei chongsuk chongsaaiñ wei miat i bha ka imlang sahlang hapoh ka chnong ka thaw ka ri ka muluk, kyrsu kyntu u wow man kiwa tip u ya burom kylliang wot hapyrdi i yaphær ha kiwa boon ki rukom.
Ha kani ka sngi neiliang ka Khynroo Khyllood Committee da saam ko leh ya ki Prize cha kiwa jop yong ka Drawing-Painting Competition kiwa kynthup ya ka Riheiburom Shullai, u Elmonzavivian Laloo wa ka Iarisa I Haka Lywait kiwa man kiwa jop yong ka yakob dro ki khynnah wa em hapoh 9 snem i rta neitæ won ya ka Nangroi Laloo, u Ove Elford Laloo, ka Arphiwansa Laloo wa ka Charrisa Manka Pakma kiwa da jop ya ka yakob dro ki khynnah wa 10 snem chaneiñ.
Iwa kyrpang chooh leh ha kani ka sngi chwa wow yoh ki kyntien sñiawngooh na u Lewansa O Laloo, Secretary KKC, neiliang ka dorbar chnong da pynkhreh ko leh ya ka Independence Day Pledge næ ki kyntien kular kam wow e mynsien ya waroh ki khon ka dorbar chnong ha ka thong wow wanrah yei chongsuk chongsaaiñ, i miat i bha ka imlang sahlang wa ka Tipbru Tipblai.
Discussion about this post