Ka 1 tarik Naisaphra toh kawi na ki sngi wa kyrpang yong ka World Scouts Organization kawa tip kam ka World Scouts Scarf Day, kamtæ ka District Association yong ka Meghalaya Bharat Scouts and Guides, West Jaiñtia Hills ha ka thong wow pynyoo hakhmat ka pyrthai yei man kyrpang kani ka sngi da khut pynman ko ka yachemlang ha District Headquarter wa em ha Jowai hapyrdi i wan chimbyntalang ki Scouts Master, Guides Captain, Rover-Rangers wa ki Scouts-Guides.
U Pet Dhar, Jt. Secretary, MBSG, West Jaiñtia Hills ha kani ka yachemlang da e u ki kyntien yahkhmat heiyatoh wa kani ka sngi katwa u Trebor Talang, Asst. District Organizer Scouts hawa kut da e u ki kyntien khublei.
Ka thong wa ka yurim yong kani ka World Scouts Scarf Day toh chibynta wow kynmoo burom ya ka sngi sdang u Lord Baden Powel ya kawi na ki Camping yong ki khynnah Scout kawa man ha u snem 1907 ha Brownsea Island wei ya kani ka World Scouts Scarf Day da sdang u leh burom nadooh u snem 2007 kawa man ka snem wow leh burom yei dap 100 snem i sdang u Lord Baden Powell ya ka Scouts Movement.
U Ohiwot Laloo, District Commissioner Scouts, West Jaiñtia Hills hawa e kyntien heiyatoh wa kani ka sngi da ong u, man ko ka sngi wow pynkynmoo yei man kordor yong i Scarf ha uwi pa uwi wa kawi pa kawi ka dkhot yong ka Scouts-Guides Movement neibhah lyngba i Scarf ye i u leh chiboon ki kaam hei wow yarap ya ki para bru.
Chooh chooh hajrong ka phang pyrdi namo ka Theme yong kani ka sngi wa ong ‘Our World-Our Future and Gender Equality’ da kyrsu kyntu u ya waroh ki dkhot ka Movement wow yakrehlang khnang yow ye u yoh yei wa miat wa bha tam hapoh ka imlang sahlang yong ka chnong ka thaw, ka District ka jylla waroh kawi.
Discussion about this post