Jowai: Kam ka dak wow leh burom ya ka sngi Yoga yong chityllup pyrthai, ka Tep Kyndait Government U.P. School, Tuber Kmaichnong ynne ka 26 tarik da pynman ko ya ka leh yoga ha skur yong ka.
Chwa u sdang da yoh ya ki kyntien na u Headmaster ka skur, u Riquoma Rq. Laloo heiwa da pdiang burom u ya u Kamnipaia Challam wa man uwa sikai Yoga hapoh ka Jaiñtia Hills District heijooh i por ya ki kiwa sikai skur wa yaki khynnah skur, da ong haroh u, wa ka Yoga toh kawa emkaam bha hei im yong i ki bru khamtam ki khynnah skur yow yoh yei thij i pyrkhat wa ka khooid wa suba.
Da kyntu u leh ya ki khynnah skur, deiwa ong, wa kani man ko i sdang donhi wow yah sikai Yoga yaphi, emkaam u pynmyllien phi ha yung leh u leh ya ki Exercise wa daw pynyoo u ya phi, ham leh danda weiwa ham swe.
Dayoh leh yei klam na uwa sikai Yoga, u Kamnipaia Challam, uwa da batai bniah yei mut ka Yoga, iwa wan nei ktien Sanskrit wa neh hadooh katni iwa dang pyn emkaam ki, da batai haroh u ya ki myntoi wow yoh nei leh Yoga.
Da e khublei u leh ya u Headmaster uwa da chynna jngai u deiwa ya chimbynta ha ka International Yoga Day, deiwa ong, wa i por dang biang bha i hanlada ka tai ka sngi tip yaka haka 21 tarik uni u bnai.
Da pyn ka-it u ya ki khynnah hei klam yong oo, deiwa ong u, lada sñiaw emkaam ki wow wan yah sikai u ya ki ar næ le sngi chi tayaw leh wan hi u, da batai u ya ki kyrdan wei myntoi yong i myllien u leh næ sikai yoga, chooh chooh da ong u wa na i myllien leh Yoga, ki bru tip ki u burom ya ki dahi deiwa ye ki u yait ya na ki myllien wasih nadooh na yung, cha surok wa cha kiwon kiwon ki thaw wa em ki.
Hadien wa da yoh yei batai bnaih na u Challam, da sdang ya ka e sikai Yoga khajuk khajak heiwa da ya chimbynta lang u Headmaster, kiwa sikai wa ki khynnah skur.
Discussion about this post