Leh burom ka WWC Loomkyrwiang Dorbar Chnong ya ka International Women’s Day

Kamwa da tiplang wa ka 8 tarik u Wisu khlieh u snem toh ka International Women’s Day næ ka sngi kyrpang ki kynthai kawa da leh burom ha ki rukom ki dur waphær waphær ha kylleiñ ki ri ka pyrthai, kamtæ ka Women’s Welfare Committee yong ka Dorbar Chnong Loomkyrwiang leh ha uni u snem da pynman ko ka yalang wa kyrpang ha Yungwalieh katkam ka phang namo ka Theme wa ong “Invest Women” heiwa ki khon kynthai ka chnong nadooh ki manbei deilang ki khyllood da wan ki wow ya chimbynta.

Ha ka yalang wa kyrpang yong kani ka sngi wa da pynlai da ka Samhakani Laloo, Secretary WWC-LDC da yoh i ngoohblai ngoohsyiem na ka Riwanki Laloo, Member WWC-LDC neitae i klam pdiang burom na ka Wequeen Najiar, Assistant Secretary, WWC-LDC katwa hei pynkut da wan ka Kongka Shullai, Chairperson WWC-LDC kawa da yei kyntien sñiawngooh.

Ya kani ka yalang da sakhi lang da ka Dr. J.N. Shullai, Director MCSWA kam ka kongsan, ka Dengsuk Laloo, Adviser WWC-LDC kam ka symbood kongsan najrong u Waheh Chnong, u Lammat-OO Laloo, kiwa ksoh kaam ka Loomkyrwiang Dorbar Chnong wa kiwi kiwa cha khut sñiawbha.

U Lammat-OO Laloo hawa klam ha kani ka sngi da yaroh u ya kiwa yahkhmat ka Seiñ Kynthai kamjooh ya ki dkhot waroh kiwa da ye u pynman ya kani ka yalang kawa emkaam bha ha ka yurim wow wanrah i yajooh yajan wei sñiaw yaman iwi hapyrdi ki khon kynthai ka Dorbar Chnong, wei da kitbok kitrwiang u leh wow nang yohbor yoh mynsien chooh ki khon kynthai ka chnong hei wow leh ya ki kam wa miat wa bha neibynta ka yung ka sem waka imlang sahlang yong waroh kiwa chong chnong.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Dengsuk Laloo hawa e kyntien heiyatoh wa kani ka sngi da e mynsien ko ya ki para kynthai wym hoi u man kiwa dooh kyrmen hawa im ki hanla hap u maad u takhooh chiboon i eh i tynjooh.

Ka Dr. J.N. Shullai hawa klam ha kani ka yalang da kdar ko wow khana chaphang ka Theme wa ki Sub-Theme yong ka International Women’s Day ha uni u snem wei kyrpang leh da klam yillu ko yaka bynta wa yatoh wei chait i khiah ki kynthai næ ki manbei.

Chooh chooh da e mynsien ko ya ki khon kynthai wow man kiwa yatylli wei ya krehlang da ka luti i ya sñiawthooh yumut khlem da wanrah i sñiaw yaphær.

Ya kani ka yalang da pynkut da i ah yow Cake da ka men Sbuh Najiar, kawi na ki manbei wa da heh rta wei da pynbood leh kiwi ki kaam pynka-it pynwyrngia hei chimbynta ki manbei wa ki khyllood.