Ka Dorbar Chnong Chilliangraij chirup i yakrehlang waka Meghalaya Aids Control Society, ka National Health Mission kam chibynta ka dak yong i lehkmen lehburom ya ka 73rd Republic Day, da pynman ki ya ka Awareness Cum Voluntary Blood Donation Camp ha Jowai Civil Hospital Blood Bank, Jowai.
U Oriland Shylla, General Secretary, Dorbar Chnong Chilliangraij kam u chongknor yong kani ka yalang wa tbian da e u ki kyntien pdiang burom wei wow pachat leh ki kyntien yahkhmat hajrong ka thong yong kani ka kaam katwa u D.H. Pde, Waheh Chnong Chilliangraij won da chim u ka bynta wow e mynsien ya ki khon ka chnong kiwa da embyntalang hei wow pynman ya kani ka sngi kawa jop.
Ka Dr. P. Shylla, Medical & Health Officer In-charge Blood Bank, Jowai Civil Hospital hei e kyntien da klam batai ko chaphang ka Blood Donation wei da kyrsu kyntu ko leh ya ki bru wa chong chnong wow bood ya ka nongmuna wabha yong ka Dorbar Chnong Chilliangraij.
Chooh chooh hawa klam da khanna ko leh wa kat nang mih ki sngi ki bru nang sñiawthooh ki yei kordor i im yong ki para bru dei wow e yarap yei snam yong ki wei iwa boon i snam wa yoh u yarap ya ki para bru toh iwa yoh na ki Voluntary Blood Donors namo kiwa e snam sñiawbha.
Neilang ka Dr. P. Shylla dap ko dei sñiawngooh wa khroo ya ki khon ka Dorbar Chnong Chilliangraij kiwa da ya chimbynta ha kani ka sngi wei kyrmen yooluti ko leh wa i mynsien yarap ya ki para bru u nangpteiñ chooh chooh i na ki por cha ki por.
