Jowai: Ka Tep Kyndait Government U.P School, Tuber Kmaichnong, East Jaiñtia Hills District chirup i ya krehlang waka Dorbar Chnong Tuber Kmaichnong, ka District Soil & Water Conservation, EJH waka Bharati Foundation, EJH da kynmoo burom ki ynne ka sngi yei pynneh pynsah yaka bei rymaw deiwa pynman ka yalang pynsñiawthooh kamjooh i thung yaki tre dieñ.
Ya ka yalang da pyllai da u Headmaster yong ka skur, u Riquoma Rq. Laloo uwa da e leh yei kyntien pdiang warom, neitæ pynbood i klam tbian na kawa sikai yong kani ka skur, ka Memory Lyngdoh heiwa da batai ko yei emkaam u thung ya ki dieñ i wow yarap hei wow pynkhooid pynjngiar ya ka la-ær wa riñ pynhiar mynsien i.
Da kyntu ko leh ya kiwa yahkhmat ka chnong wow man ki kiwa ye u khang ya kiwa thang khloo cha loom næ cha ki thaw wa thung dieñ heipor tlang, neitæ pynbood i klam na u Albert Dkhar, Demonstrator, District Soil & Water Conservation, EJH uwa da e chikyntien arkyntien donhi heiyatoh wa kammon u pyrchah ya ka la-ær watngit kam ka phang yong u snem kawa ong “Beat Air Pollution”.
Ka Academic Mentor yong ka Bharati Foundation,EJH, ka Dayoophika Khyriem hei batai bniah yong ka da e nongmuna ko cha ki sorbah yeiktah i tngit ka la-ær, da kylli ko leh ya ki khynnah skur wa neiyi i daw wa yahkhmat yowni u snem u lehkmen ya ka World Environment Day ha ka ri China.
u waheh chnong, Tuber Kmaichnong u Jied Sana, ong u wa i khooid i pliah emkaam bha ki, wym wow khooid du ha yung tangwa liang wa nang. Heijooh i por kular u wow e yaki Dustbin ya ka skur kam ka dak i yakrehlang wow pyrchah yei tngit i tngar, wei da pyntip haroh u waka chnong Tuber u pynchitom ko ya kiwa pyrchah ya ki aiñ chnong khamtam kiwa thang sympoor cheithaw thung dieñ wa ya kiwa leh dusmon ya ki doh um.
Hawa yoh won yei kyntien e khublei na u Ribait oo Pde, uwa sikai ka skur ong u, “Wa nadooh wamih i cha pyrthai, ka Bei Rymaw wadiang ya i; tæ i wan, toh u tip i u burom ya ka, deiwa pynneh pynsah ya ki dieñ kiwa man ki doh ki pran yong ka, heijooh ipor lada deiñ i uwi u dieñ, emkaam u thung i chiphaw tylli”.
Kamtæ neiliang u Headmaster da ban joor u ya ki khynnah skur watoh u syndong bha ki ya ki dieñ wadep thung ki, yoh ki u heh u san kamwa ki khynnah skur leh heh ki.
Hadien ka yalang da em won i ya thung dieñ wada chim bynta da ki khynnah skur wa kiwi.
Discussion about this post